ەلوردالىقتار قوعامدىق كولىكتە ءبىر اي 50 پايىز جەڭىلدىكپەن جۇرە الادى

نۇر-سۇلتان. قازاقپارات - ەلوردالىقتار مەن قالا قوناقتارى قوعامدىق كولىك قىزمەتى ءۇشىن ءبىر اي 45 تەڭگەدەن تولەي الادى، دەپ حابارلايدى قازاقپارات.

«جولاقىنى %50 جەڭىلدىكپەن SMS جانە QR-كود ارقىلى تولەي الاسىز. اكسيا 18 -قاراشادان باستالىپ، 18 -جەلتوقسانعا دەيىن جالعاسادى»، - دەپ ءمالىم ەتتى «Astana LRT» كومپانياسىنان.

مۇنداي اكسيانى ۇيالى بايلانىس وپەراتورلارىنىڭ ءبىرى ۇسىنىپ وتىر.

اتاپ ايتقاندا، تولەمدى SMS نەمەسە QR- كود ارقىلى جاساعان كەزدە تەلەفون نومىرىنەن جول ءجۇرۋ بيلەتىنىڭ تولىق سوماسى - 90 تەڭگە شەگەرىلەدى. كەيىن بالانسقا 45 تەڭگە قايتارىلادى. جولاقىنى تولەۋ ءۇشىن شوتتا كەم دەگەندە 91 تەڭگە بولۋى ءتيىس.

«45 تەڭگەمەن اۆتوبۋستا كۇنىنە ەكى رەت جۇرە الاسىز. ال ءۇشىنشى جانە ودان ارعى ساپارلارىڭىز ءۇشىن ستاندارتتى - 90 تەڭگە تولەيسىز. اكسيا تەك قالالىق باعىتتاردا جۇرەدى. باعاسى 180 تەڭگە بولاتىن ەكسپرەسس- مارشرۋتتاردا، سونداي-اق اقىسى 90، 200، 300 جانە 400 تەڭگەلىك قالاماڭى مارشرۋتتارىندا جەڭىلدىك قاراستىرىلماعان»، - دەپ ناقتىلادى «Astana LRT» - دان.