الەمنىڭ 50 ەلىندە «اباي دومبىراسى» مادەني شاراسى وتەدى

 نۇر- سۇلتان. قازاقپارات - قازاقتىڭ ۇلى اقىنى ابايدىڭ 175  جىلدىق مەرەيتويىنا وراي 2020 -جىلدىڭ 5 - شىلدەسىندە 50 دەن استام شەت ەلدە حالىقارالىق «اباي دومبىراسى-party» شاراسى وتەدى، دەپ حابارلايدى قازاقپارات ءتىلشىسى.

«ق ر تۇڭعىش پرەزيدەنتى - ەلباسى نۇرسۇلتان نازاربايەۆ جىل سايىن شىلدەنىڭ ءبىرىنشى جەكسەنبىسىندە ۇلتتىق دومبىرا كۇنىن اتاپ ءوتۋ باستاماسىن كوتەرگەن بولاتىن. وسىعان وراي 2020 -جىلدىڭ 5 - شىلدەسىندە 50 دەن استام شەت ەلدە حالىقارالىق «اباي دومبىراسى-party»  مادەني شاراسى وتەدى»، - دەپ اتاپ وتەدى ق ر سىرتقى ىستەر مينيسترلىگىنىڭ باسپا ءسوز قىزمەتىنەن.

سونىمەن قاتار اباي اتىنداعى قازاق مەملەكەتتىك اكادەميالىق وپەرا جانە بالەت تەاترى مەن «استانا وپەرا» تەاترى ا. جۇبانوۆ پەن ل. ءحاميديدىڭ «اباي» وپەراسىمەن شەتەلگە گاسترولدەرگە شىعادى.

«ال ناۋرىز مەيرامىندا شەت ەلدەردە ءبىلىم الىپ جاتقان جاستارىمىز، وتانداستارىمىز ناۋرىز مەيرامى قارساڭىندا ەلشىلىكتەردە «ۇلى اباي - حالىق جۇرەگىندە» اتتى اباي شىعارماشىلىعى نەگىزىندە ديكتانت جازىپ، مەن ابايدى وقيمىن حالىقارالىق چەللەندجىنە قاتىسادى» ، - دەيدى ۆەدومستۆودان.

ەستەرىڭىزگە سالا كەتسەك، تاياۋدا اقوردادا مەملەكەتتىك حاتشى قىرىمبەك كوشەربايەۆتىڭ توراعالىعىمەن ابايدىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا وتىرىسى وتكەن بولاتىن. سول جيىندا 2020 -جىلدىڭ 8 - قاڭتارىندا ەلورداداعى «قازاقستان» ورتالىق كونسەرت زالىندا حاكىم ابايدىڭ 175 جىلدىق مەرەيتويىنىڭ باستالۋىنا ارنالعان سالتاناتتى شارا وتەتىندىگى بەلگىلى بولعان ەدى.

جالپى، كەلەسى جىلى ۇلى اقىننىڭ 175 جىلدىق مەرەيتويىنا وراي الەمنىڭ ءبىرقاتار قالاسىندا اباي ەسكەرتكىشى بوي كوتەرىپ، ەستەلىك پوشتا ماركالارى شىعارىلادى، ورتالىقتار اشىلادى.

مۇنان بولەك اقىن شىعارمالارى الەمنىڭ 30 تىلىنە اۋدارىلادى.