قاراعاندىدا 50 كيىكتى اتىپ ولتىرگەندەر ىزدەستىرىلىپ جاتىر

None
None
قاراعاندى. قازاقپارات - قاراعاندى وبلىسىنىڭ نۇرا اۋدانىندا مۇيىزدەرى ارالاپ الىنعان 50 كيىكتىڭ ولەكسەسى تابىلعان. جانۋارلار قورعالجىن قورىعىنىڭ اۋماعىندا تابىلدى، دەپ حابارلايدى قازاقپارات ءتىلشىسى.

50 كيىكتىڭ ولەكسەسىن تاۋىپ العانى تۋرالى حابارلامانى قورىقتىڭ ديرەكتورى ءبىرىنشى بولىپ ءتيىستى ورگاندارعا جەتكىزگەن. ايتا كەتۋ كەرەك، قورعالجىن قورىعى اقمولا جانە قاراعاندى وبلىستارىنىڭ اۋماعىندا ورنالاسقان. قۇقىق قورعاۋ ورگاندارىنىڭ وكىلدەرى قورىقتى تەكسەرۋ بارىسىندا جانۋارلاردىڭ ءولى دەنەلەرى قورىقتىڭ قاراعاندى وبلىسى جاعىنداعى اۋماعىنان تابىلعانىن مالىمدەدى. تەرگەۋ كەزىندە سايعاقتاردىڭ بارلىعىن قارۋمەن اتىپ ولتىرگەنى انىقتالعان.

 نۇرا اۋدانىنىڭ اۋماعىندا كيىكتەردىڭ ولەكسەسىن تابۋ دەرەگى بويىنشا قازاقستان رەسپۋبليكاسى قىلمىستىق كودەكسىنىڭ 337-بابى 4-تارماعىنا سايكەس سوتقا دەيىنگى تەرگەۋ امالدارى باستالدى.

 اتالعان قىلمىستى اشۋعا بايلانىستى وبلىستىق پوليتسيا دەپارتامەنتى باسشىلىعى اقمولا وبلىسى قورعالجىن پوليتسيا بولىمىمەن بىرلەسىپ كينولوگ، تابيعاتتى قورعاۋ پوليتسيا ءبولىمى، جەدەل ۋاكىلدەر جانە ۋچاسكەلىك پوليتسيا ينسپەكتورلارىنان 2 ارنايى توپ قۇردى. توپتىڭ قىزمەتكەرلەرى قىلمىستىڭ الدىن الۋ، اشۋ جانە كۇدىكتىلەردى ۇستاۋ بويىنشا كەشەندى جۇمىستار اتقارۋدا.

وبلىستىق پوليتسيا دەپارتامەنتى قازاقستان رەسپۋبليكاسى قىلمىستىق كودەكسىنىڭ 337-بابى 4-تارماعى بويىنشا قۇقىق بۇزۋشىلار بەس جىلعا دەيىن باس بوستاندىعىنان ايىرىلاتىنىن ەسكەرتەدى.

سوڭعى جاڭالىقتار