ياندەكستىڭ 500 مىڭ جۇرگىزۋشىسى سالىق تولەيتىن بولادى - زاڭ جوباسى
بۇل تۋرالى سەناتتىڭ جالپى وتىرىسىندا الەۋمەتتىك كودەكس جوباسى مەن ىلەسپە زاڭ جوبالارىن ءبىرىنشى وقىلىمدا تالقىلاۋ كەزىندە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
ءبىرىنشى - ەڭبەك نارىعىن ىرىقتاندىرۋ. بۇل - يكەمدى جۇمىسپەن قامتىلۋدىڭ بارلىق تۇرلەرىن، ونىڭ ىشىندە پلاتفورمالىق جۇمىستى تانۋدى بىلدىرەدى. بۇل وزگەرىستەر نەگىزىنەن ءوزىن- ءوزى جۇمىسپەن قامتىعان ازاماتتاردى الەۋمەتتىك تاۋەكەلدەردەن ساقتاندىرۋ، ال تاۋەكەل بولعان جاعدايدا الەۋمەتتىك قولداۋدى قاراستىرادى. وسى ماقساتتا بۇل ساناتتاعى ازاماتتاردى «تاۋەلسىز جۇمىسكەر» دەپ اتاۋ ەنگىزىلدى. ولار - تابىس اكەلەتىن ەڭبەك قىزمەتىمەن اينالىساتىن، ءبىراق ءتيىستى ۋاكىلەتتى ورگانداردا رەسمي مەملەكەتتىك تىركەلمەگەن تۇلعالار. مۇنداي قىزمەتكەرلەردىڭ قىزمەتى ونلاين پلاتفورمالار وپتسياسىنا قوسقان نەمەسە جاريا شارت جاساعان جاعدايدا رەسمي جۇمىسپەن قامتىلعان دەپ تانىلادى.
ونىڭ اتاپ وتۋىنشە، مىسالى ونلاين ياندەكس پلاتفورماسىنا قوسىلعان تاكسيستەر، Glovo پلاتفورماسىنداعى كۋرەرلەر وسىنداي ساناتتاعى جۇمىسكەرلەرگە جاتاتىن بولادى.
«قازىر ءبىزدىڭ ەلدە تەك ياندەكس تاكسيدىڭ وزىندە عانا قازىر 500 مىڭعا جۋىق ادام جۇمىس ىستەيدى. Glovo-دا 200 مىڭ ادام قىزمەت ەتىپ ءجۇر. جالپى پلاتفورمالىق جۇمىستا 1 ميلليونعا جۋىق ازامات جۇمىس ىستەيدى. ولارعا وسى جۇمىس يكەمدى، تابىس كوزىنىڭ ءبىرى بولعاندىقتان بۇگىنگى جۇمىسىنا ەشقانداي كەدەرگى كەلتىرمەيتىن، ءبىراق ولاردى فورمالدى جۇمىس ىستەپ جۇرگەن ازامات رەتىندە تانۋ ءۇشىن، ەگەر سول پلاتفورماعا كىرگەن بولسا، ياعني جاريا كەلىسىمشارتقا قول قويسا، وندا ول ازامات تاۋەلسىز جۇمىسكەر رەتىندە تانىلادى»، - دەدى تامارا دۇيسەنوۆا.
مينيستر الەۋمەتتىك كودەكستە پلاتفورما سالىق اگەنتى رەتىندە قاراستىرىلىپ جاتقانىن ايتتى
«ياعني سول ازاماتتار ءۇشىن سالىققا نەمەس الەۋمەتتىك قامسىزداندىرۋعا تولەنەتىن قاراجاتتارىن سالىق اگەنتى رەتىندە پلاتفورمانىڭ وپەراتورلارى تولەيتىن بولادى. بولماسا ازاماتتىڭ ءوزى جەكە كاسىپكەر رەتىندە تولەيتىندەي مۇمكىندىك قاراپ وتىرمىز. ول ازاماتقا الەۋمەتتىك تولەم تولەنەتىن بولسا، ونىڭ قاجەتتى كومەكتى الۋىنا قۇقىعى بولادى»، - دەدى مينيستر.