الماتى وبلىسىندا قايىرىمدى جاندار ەكىباستۇزعا 500 جىلىتقىش قۇرال جەتكىزدى
كاسىپكەر جانە مەتسەنات زيا تالعاتوۆ قيىن جاعدايدا قالعان ەكىباستۇزدىقتارعا قولدان كەلگەنشە كومەك كورسەتۋگە ۇلەس قوساتىنىن، شەتتە قالمايتىنىن اتاپ ءوتتى.
«قازىر 500 دانا جىلىتقىش قۇرال تيەلگەن جۇك كولىگى جولعا شىقتى. ءبىزدىڭ كومپانيا قايىرىمدىلىق جۇمىستارىمەن بەلسەندى تۇردە ءجيى اينالىسادى. جىل سايىن بيۋدجەتكە حالىقتى الەۋمەتتىك قولداۋ ءۇشىن، ونىڭ ىشىندە مەكتەپ، ءۇي، مەشىت سالۋعا جانە ەلدىڭ شالعاي وڭىرلەرىندەگى بالالارعا سىيلىق تاراتۋ ماقساتىندا شامامەن 30 ميلليون تەڭگە بولىنەدى. ەڭ قيىن ساعاتتا ادامداردىڭ ءبىر- ءبىرىن قولداپ، ءبىر مۇددە اياسىندا بىرىگە الۋى تۇتاس ەلدىڭ بىرلىگىن ارتتىرىپ، ەلدىڭ ىشكى رۋحىنىڭ مىقتى بولۋىنا سەپتىگىن تيگىزەدى»، - دەيدى زيا تالعاتوۆ.
سونداي- اق، بيزنەسمەن لوگيستيكا جانە كوممۋنيكاتسيا ماسەلەسىندە الماتى وبلىسىنىڭ اكىمدىگى قولداۋ كورسەتكەنىن اتاپ ءوتتى.
بۇگىندە جىلىتۋ قۇرالدارى ەكىباستۇز تۇرعىندارىنىڭ وتىنىمىنە سايكەس تاراتىلدى.
ەكىباستۇز قالاسى اكىمىنىڭ ورىنباسارى ماريام ماليكوۆا اتاپ وتكەندەي، اتالعان جىلىتۋ قۇرالدارى باۋىرجان مومىش ۇلى مەن ءماشھۇر ءجۇسىپ كوشەسىندەگى كوپپاتەرلى ءۇيدىڭ تۇرعىندارىنا ۇلەستىرىلگەن.
