اتىراۋ پوليسەيلەرى براكونەرلەردەن 500 كەلىدەن استام بەكىرە تاركىلەدى
وبلىستىق پوليتسيا دەپارتامەنتىنىڭ باستىعى، پوليتسيا پولكوۆنيگى نۇرحات ورازبايەۆتىڭ مالىمەتىنشە، ءتارتىپ ساقشىلارى 1-ساۋىردەن بەرى 1 توننا بالىق تاركىلەگەن. ونىڭ ىشىندە 500 كەلىدەن استام بەكىرە بار.
«بيىلعى 1-ساۋىردە جايىق- كاسپي باسسەينىنىڭ سۋ ايدىندارىندا «بەكىرە - 2022» كەڭ اۋقىمدى بالىق قورعاۋ ءىس- شاراسى ءوتىپ جاتىر. اتالعان ءىس- شارا قۇقىق، تابيعات قورعاۋ ورگاندارىمەن بىرگە جويىلىپ كەتۋدىڭ الدىندا تۇرعان باعالى بەكىرە تۇقىمداس بالىق تۇرلەرى پەن بالىق ونىمدەرىنىڭ زاڭسىز اينالىمىن انىقتاۋ، الدىن الۋ جانە جولىن كەسۋ ءۇشىن وتكىزىلىپ جاتىر. ءىس- شاراعا بايلانىستى «اتىراۋ- رەسەي فەدەراتسياسىنىڭ شەكاراسى»، «اتىراۋ- اقتوبە»، «اتىراۋ- ورال» جانە «اتىراۋ- يندەر» باعىتىنداعى رەسپۋبليكالىق، وبلىستىق ماڭىزى بار جولداردا، كاسپي تەڭىزىنىڭ، جايىق، قيعاش وزەندەرىنىڭ جاعالاۋىندا 39 جىلجىمالى موبيلدىك توپ قىزمەت اتقارۋدا.
زاڭسىز بالىق اۋلاۋدىڭ جولىن كەسۋ ءۇشىن جايىق وزەنى جاعالاۋىنا 19 بەينەباقىلاۋ كامەراسىمەن باقىلاۋ جۇرگىزىلىپ وتىر. زاڭسىز بالىق اۋلاۋشىلارعا قاتىستى 18 قىلمىستىق ءىس قوزعالدى. ونىڭ ىشىندە 2 ءىس ق ر قىلمىستىق كودەكسىنىڭ 335-بابىمەن (بالىق رەسۋرستارىن زاڭسىز اۋلاۋمەن)، ال، 16 ءىس 339-بابىمەن (جانۋارلاردىڭ سيرەك كەزدەسەتىن تۇرلەرىمەن زاڭسىز اينالىسۋ) تەرگەلىپ جاتىر»، دەيدى نۇرحات ورازبايەۆ.
ونىڭ ايتۋىنشا، پوليسيا قىزمەتكەرلەرى 28-ساۋىردە 36 جاستاعى ايەلدىڭ تۇرعىلىقتى مەكەن- جايىنا ءتىنتۋ جۇرگىزگەن. سول كەزدە 15,8 كەلى بەكىرە تۇقىمداس، 5 كەلى قارا بالىق تاركىلەنگەن. قازىر اتالعان دەرەككە قاتىستى قىلمىستىق كودەكستىڭ 339-بابىنىڭ 1-بولىگىمەن سوتقا دەيىنگى تەرگەپ- تەكسەرۋ باستالدى.
ەسكە سالا كەتەلىك، بۇعان دەيىن براكونەرلەردەن 1 تونناعا جۋىق بەكىرە تاركىلەنگەنىن حابارلاعان بولاتىنبىز.
اۆتور: بەك مۇستافا