بيىلدان باستاپ 500 قازاقستاندىق عالىم مەملەكەت ەسەبىنەن شەتەلدە تاعىلىمدامادان وتەدى
دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
بيىلدان باستاپ مەملەكەت باسشىسىنىڭ تاپسىرماسى بويىنشا 500 قازاقستاندىق عالىم مەملەكەت ەسەبىنەن شەتەلدە تاعىلىمدامادان وتەدى. وزىق عىلىمي تەحنولوگيالاردى ترانسفەرتتەۋ ماقساتىندا مەملەكەت باسشىسى ق. توقايەۆتىڭ «جاڭا جاعدايداعى قازاقستان: ءىس- قيمىل كەزەڭى» اتتى قازاقستان حالقىنا جولداۋىندا 500 عالىمنىڭ الەمدەگى جەتەكشى زەرتتەۋ ورتالىقتارىندا جىل سايىن تاعىلىمدامادان ءوتۋىن قامتاماسىز ەتۋدى تاپسىرعانى بەلگىلى.
جيىندى اشقان مەملەكەتتىك حاتشى بۇگىندە ءتۇرلى سالا ماماندارىنا وزدەرىنىڭ كاسىبي بىلىمدەرىن جاڭارتۋعا مۇمكىندىك بەرەتىن قىسقا مەرزىمدى وقىتۋدىڭ نەمەسە تاعىلىمدامانىڭ ماڭىزدىلىعى ارتىپ كەلە جاتقانىن اتاپ ءوتتى. بۇعان «بولاشاق» باعدارلاماسى بويىنشا ۇمىتكەرلەر اراسىنداعى ۇلكەن كونكۋرس دالەل. وسىعان بايلانىستى حالىقارالىق باعدارلاما شەڭبەرىندە عالىمدار ءۇشىن تاعىلىمدامالاردىڭ ارنايى ساناتى بەكىتىلدى.
وتىرىس بارىسىندا كوميسسيا مىناداي ساناتتار بويىنشا تاعىلىمدامالاردى بەكىتتى: عالىمدار، دەنساۋلىق ساقتاۋ سالاسىنداعى قىزمەتكەرلەر، پەداگوگتار، مەملەكەتتىك قىزمەتشىلەر، ينجەنەرلىك- تەحنيكالىق قىزمەتكەرلەر.
ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا، تاعىلىمداما ساناتتارىنىڭ ءتىزىمىن قالىپتاستىرۋ كەزىندە مەملەكەتتىك ورگاندار مەن مۇددەلى ۇيىمداردان كەلىپ تۇسكەن وتىنىمدەر نەگىزىندە نارىقتىڭ ناقتى قاجەتتىلىگىنە تالداۋ جۇرگىزىلگەن. جالعاسىپ جاتقان پاندەميا جاعدايىنداعى جاڭا سىن- قاتەرلەردى ەسكەرە وتىرىپ، عىلىمي، مەديتسينالىق جانە ينجەنەرلىك- تەحنيكالىق قىزمەتكەرلەردىڭ تاعىلىمدامالارىنا باسىمدىق بەرىلەدى.
وتىرىس قورىتىندىسى بويىنشا مەملەكەتتىك حاتشى قىرىمبەك كوشەربايەۆ «بولاشاق» حالىقارالىق ستيپەندياسىن ىسكە اسىرۋدىڭ تەتىكتەرىن ودان ءارى جەتىلدىرۋ جانە ونىڭ تيىمدىلىگىن ارتتىرۋ جونىندە ءبىرقاتار تاپسىرما بەردى.