كوكشەتاۋ تۇرعىنى بانكوماتتا بىرەۋدىڭ 500 مىڭ تەڭگەسىن يەمدەنىپ كەتكەن

كوكشەتاۋ. قازاقپارات - اقمولا وبلىسىندا ەر ادام بانكوماتتا وزگە بىرەۋدىڭ قالدىرىپ كەتكەن جارتى ميلليون تەڭگەسىن يەمدەنىپ كەتتى، دەپ حابارلايدى قازاقپارات ءتىلشىسى وبلىستىق پ د باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، وقيعا 27- قازاندا كوكشەتاۋ قالاسىندا ورىن الدى. 39 جاستاعى جەرگىلىكتى تۇرعىن ارىزدانىپ، بەلگىسىز بىرەۋدىڭ 540000 تەڭگە اقشاسىن بانكوماتتان شەشىپ الىپ كەتكەنىن ايتقان.

«انىقتالعانداي، زارداپ شەگۋشى بانكومات ارقىلى اقشا اۋدارماقشى بولعان. ول الدىمەن اقشانى ۇياشىققا سالىپ، كەيىن وپەراتسيانى تولىق اياقتاۋسىز قالدىرادى. وسى كەزدە ودان كەيىنگى كليەنت ول اقشانى الىپ، بانكتىڭ قاۋىپسىزدىك قىزمەتىنە ايتپاي كەتىپ قالادى»، - دەيدى ۆەدومستۆودان.

ءتارتىپ ساقشىلارى ەر ادامدى انىقتادى. ول كوكشەتاۋ قالاسىنىڭ 45 جاستاعى تۇرعىنى بولىپ شىقتى.

قازىرگى كەزدە وعان پروتسەسسۋالدىق شەشىم قابىلداۋ ماسەلەسى قارالىپ جاتىر.