سولتۇستىك قازاقستاندا 500 گەكتار اۋماق ورتەنىپ كەتتى

پەتروپاۆل. قازاقپارات - سولتۇستىك قازاقستان وبلىسى عابيت مۇسىرەپوۆ اۋدانىندا دالا ءورتى شىعىپ، جاقىن ماڭداعى اۋىلدى ءتىلسىز جاۋدان امان الىپ قالۋ ءۇشىن جالىنمەن التى ساعات بويى الىسۋعا تۋرا كەلدى، دەپ حابارلايدى قازاقپارات ءتىلشىسى.

س ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، 15- ماۋسىم كۇنى تۇسكە جاقىن عابيت مۇسىرەپوۆ اۋدانىنداعى چيستوپولە ەلدى مەكەنىندەگى 20№ ءورت ءسوندىرۋ بولىمشەسىنە جاركول اۋىلىنىڭ ماڭىندا قۋراعان دالا ءشوبىنىڭ جانىپ جاتقاندىعى تۋرالى حابار تۇسەدى.

وقيعا ورنىنا بىردەن كەزەكشى قاراۋىل اتتانادى. دالا ءورتىنىڭ اۋقىمىن كورگەن ماماندار كومەككە قوسىمشا كۇش پەن تەحنيكا سۇراتىپ، جەرگىلىكتى بيلىكتى، ەرىكتى ءورت ءسوندىرۋ قۇرىلىمدارىن حاباردار ەتەدى.

«ءورت جاركول اۋىلىنان 10 شاقىرىمداي جەردە شىققان ەكەن. ءبىز كەلگەندە بىرنەشە جۇزدەگەن گەكتار جەر جانىپ جاتتى. ورتپەن كۇرەستى قاتتى جەل قيىنداتا ءتۇستى. جەلدىڭ باعىتى اۋىسقان جاعدايدا ەلدى مەكەن وتقا ورانار ەدى. وعان جول بەرمەۋ ءۇشىن بار كۇشىمىزدى سالۋعا تۋرا كەلدى»، - دەيدى ع. مۇسىرەپوۆ اۋدانى توتەنشە جاعدايلار ءبولىمىنىڭ باستىعى ۆلاديمير حۋتينايەۆ.

ءورت سوندىرۋشىلەرگە «اقان سەرى ورمان شارۋاشىلىعى» ك م م جانە اكىمدىكتىڭ قىزمەتكەرلەرى، جەرگىلىكتى تۇرعىندار كومەككە كەلدى. سونداي-اق ءورت شىققانىن ەستىپ 60 شاقىرىم جەردەن «س پ گارشينو» ج ش س ەرىكتى ءورت ءسوندىرۋ قۇرىلىمىنىڭ ءورت سوندىرۋشىلەرى جەتتى.

ناتيجەسىندە التى ساعاتتان كەيىن جالىن تولىقتاي اۋىزدىقتالدى. مامانداردىڭ ايتۋىنشا، ءورت 500 گەكتار القاپقا جايىلدى، جەدەل جانە بىرلەسكەن ءىس-ارەكەتتىڭ ناتيجەسىندە جالىننىڭ ۇلكەن اۋماققا تارالۋىنا جانە اۋىلعا كىرۋىنە جول بەرىلمەدى.