اقمولا وبلىسىنداعى كاسىپورىن جىلىنا 500 مىڭ اياق كيىم شىعارادى
سوڭعى جىلدارى كاسىپورىننىڭ اياق-كيىم ونىمدەرىنە سۇرانىس ارتقان، دەپ حابارلايدى قازاقپارات ءتىلشىسى.
اياق-كيىم وندىرىسىندە ون جىلدان استام ۋاقىت جۇمىس ىستەپ كەلە جاتقان كاسىپورىن وسى از ۋاقىتتىڭ ىشىندە وتاندىق نارىقتا ءوزىنىڭ ورنىن تاۋىپ، شەتەل نارىعىن باعىندىرۋدا. كاسىپورىن رەسەي، بەلارۋس، تۇركيا، ا ق ش، انگليا جانە شىعىس ەۋروپا ەلدەرىنىڭ جەتەكشى فابريكالارىنىڭ تەحنولوگياسى بويىنشا ارنايى ماقساتتاعى اياق كيىمدەردى شىعارادى.
«SAMHAT» ج ش س باس ديرەكتورى سامال تىلەۋبايەۆانىڭ ايتۋىنشا، كارانتين شارالارى كاسىپورىن جۇمىسىنا، اسىرەسە، شيكىزات جەتكىزۋ جانە دايىن ءونىمدى تاسىمالداۋدا ءبىراز كەدەرگى كەلتىرگەنىمەن، قازىرگى كەزدە ءوندىرىس قايتا جاندانىپ، ونىمگە سۇرانىس ارتقان.
«اياق كيىم تىگۋ - كۇردەلى جۇمىس. تۇتىنۋشىلاردىڭ كادەسىنە جاراتۋ بار دا، باسەكەلەستىككە توتەپ بەرۋ بار عوي. سوندىقتان، ءبىز ونىمدەرىمىزدىڭ ءمىنسىز بولۋىن قالايمىز. بۇل ءبىزدىڭ باستى ۇستانىمىز. ويتكەنى، ءونىمنىڭ نەگىزگى ارتىقشىلىعى ساپاسىندا. سوندىقتان، ءبىز ءونىمنىڭ ساپالى بولۋى ءۇشىن شەتەلدىڭ جەتەكشى فابريكالارىنىڭ تەحنولوگياسى بويىنشا جۇمىس ىستەيمىز. ءونىم بارلىق تالاپتارعا جانە ق ر مەملەكتتىك ستاندارتىنا ساي كەلەدى»، - دەيدى سامال تىلەۋبايەۆا.
كاسىپورىن باسشىسى اتاپ وتكەندەي، فابريكانىڭ قۋاتى جىلىنا 500 مىڭ جۇپ اياق كيىم شىعارۋعا جەتەدى. سول كەزدە 150 ادامدى جۇمىسپەن قامتۋ مۇمكىندىگىنە يە بولادى ەكەن. ازىرگە كەيبىر مامانداردىڭ جوقتىعى قولبايلاۋ بولىپ وتىرعان كورىنەدى.
ماسەلەن، تەحنولوگ، مەحانيك، تىگىنشى ءتارىزدى بىرنەشە ماماندىق بويىنشا ماماندار قاجەت. جۇمىس ىستەپ جۇرگەن ادامداردىڭ كاسىبي شەبەرلىكتەرىن جەتىلدىرۋ ءوز الدىنا ءبىر ماسەلە.
فابريكا بۇگىنگى تاڭدا ەرلەر جانە ايەلدەر اياق كيىمى، اسكەري-كۇشتىك قۇرىلىمدارعا، جۇمىسشىلارعا ارنالعان اياق كيىمدەر شىعارادى.
ايتا كەتەيىك، «SAMHAT» ج ش س اياق-كيىم فابريكاسىن اشۋ ءۇشىن 300 ميلليون تەڭگە قارجى جۇمساعان. كاسىپورىن باستاپقىدا نۇر-سۇلتان قالاسىندا عيمارات جالداپ كەلگەن بولاتىن.
كەيىن 2014-جىلى سەلينوگراد اۋدانىنىڭ ماكسيموۆكا اۋلىندا بوس تۇرعان عيماراتتى جوندەپ، قايتا قالپىنا كەلتىردى.
كاسىپورىن باسشىلىعى كەلەشەكتە ءوندىرىس اياسىن كەڭەيتىپ، تۇرعىندار كۇندەلىكتى كيەتىن اياق كيىمنىڭ بىرنەشە ءتۇرىن شىعارۋ ماقسات تۇتىپ وتىر. بۇگىنگى كۇنى «SAMHAT» ج ش س اياق-كيىم فابريكاسى اقمولا وبلىسىنىڭ عانا ەمەس، ەلىمىزدىڭ جەڭىل ونەركاسىپ سالاسىندا ءساتتى جۇمىس ىستەپ كەلە جاتقان كاسىپورىنداردىڭ بىرىنەن سانالادى.
اقمولا وبلىستىق كاسىپكەرلىك جانە ونەركاسىپ باسقارماسىنىڭ مالىمەتىنشە، وڭىردە بيىلعى جىلدىڭ قاڭتار-ءساۋىر ايلارىندا جەڭىل ونەركاسىپ كاسىپورىندارى 2043,0 ميلليون تەڭگەنىڭ ءونىمىن وندىرگەن. بۇل كورسەتكىش بىلتىرعى جىلمەن سالىستىرعاندا 145,4 پايىزدى قۇراپ وتىر.
ناقتىراق ايتساق، ونىڭ ىشىندە توقىما بۇيىمدارىن ءوندىرۋ كولەمى 1,5 ميلليارد تەڭگە، كيىم ءوندىرۋ كولەمى 172,3 ميلليون تەڭگە، بىلعارى جانە وعان جاتاتىن ونىمدەر ءوندىرۋ كولەمى 297,5 ميلليون تەڭگەنى قۇرايدى.
وڭدەۋ ونەركاسىبى قۇرىلىمىندا جەڭىل ونەركاسىپتىڭ ۇلەسى 0,7 پايىزدى قۇرادى.