بالالار حيرۋرگى: ەڭ كىشكەنتاي ەمدەلۋشىم - 500 گرامدىق ءسابي

نۇر-سۇلتان. قازاقپارات - 600-700 گرام سالماقپەن شالا تۋعان نارەستەلەرگە وتا جاساۋ ويدا ەرەكشە ساقتالىپ قالادى.

بۇل تۋرالى ەلوردادا وتكەن پاتريوتتار فورۋمىندا ماراپاتتالعان دارىگەر ايتتى، دەپ حابارلايدى قازاقپارات ءتىلشىسى.

«ءبىزدىڭ وبلىس جاڭا تۋعان سابيلەردىڭ ءومىر ءسۇرۋ دەڭگەيى بويىنشا قازاقستاندا كوشباسشى بولىپ تۇر. قازاقستان بويىنشا سابيلەردىڭ ءومىر ءسۇرۋ دەڭگەيى - %66 بولسا، بۇل كورسەتكىش پاۆلودار وبلىسىندا - %95-97. بۇل - دارىگەرلەردىڭ بىلىكتى، ءبىلىمدى، تاجىريبەلى ماماندار ەكەنىن بىلدىرەدى»، - دەيدى بالالار دارىگەرى، پاۆلودار وبلىستىق بالالار اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى ەرلان رامازانوۆ.

حيرۋرگ ومىرىندە جاساعان ەڭ كۇردەلى وتا تۋرالى ايتتى.

«بالالار حيرۋرگى بولىپ ەڭبەك ەتىپ جۇرگەنىمە 16 جىل بولدى. ءبىز مي مەن جۇرەكتەن باسقا جەردىڭ بارىنە وتا جاسايمىز. مەنىڭ پراكتيكامدا ەڭ ۇزاق جاسالعان وتا 12 ساعاتقا سوزىلدى. مەن جاڭا تۋعان نارەستەدان باستاپ 18 جاسقا دەيىنگى بالالارعا وتا جاسايمىن. وتانىڭ وڭايى جوق، ءبىراق 600-700 گرام سالماقپەن شالا تۋعان نارەستەلەرگە وتا جاساۋ مەنىڭ ويىمدا ەرەكشە ساقتالىپ قالادى. مەنىڭ ەڭ كىشكەنتاي پاتسيەنتىم - 500 گرامدىق ءسابي. جاڭا تۋعان نارەستەنىڭ ىشەگىنە وتا جاساپ، قۋانىشقا وراي وپەراتسيا ءساتتى ءوتتى»، - دەيدى ول.

ەسكە سالا كەتسەك، سالتاناتتى ءىس-شاراعا قازاقستاننىڭ بارلىق وڭىرىنەن 200 دەلەگات قاتىستى. ونىڭ ىشىندە ءوز كاسىبىنىڭ ۇزدىك وكىلدەرى، ەل ءۇشىن قالتقىسىز قىزمەت ەتىپ، كۇندەلىكتى ەڭبەگىمەن جانە ۇلگىلى ىسىمەن جۇرت نازارىنا ىلىنگەن ازاماتتار «جىل پاتريوتى» نوميناتسياسىمەن ماراپاتتالدى.

اۆتور: زارينا قاھارمان