ەلورداداعى جارمەڭكە: اقمولالىقتار 500 توننادان استام ءونىم جەتكىزدى

نۇر-سۇلتان. قازاقپارات - نۇر-سۇلتان قالاسىندا اقمولا وبلىسىنىڭ اۋىل شارۋاشىلىعى تاۋار وندىرۋشىلەرىنىڭ جارمەڭكەسى ءوتىپ جاتىر، دەپ حابارلايدى قازاقپارات ءتىلشىسى.

«بۇگىنگى اۋا-رايىنىڭ قولايسىزدىعىنا قاراماستان اقومولا وبلىسىنىڭ جارمەڭكەسىنە استانالىقتار ەرتە جينالىپ جاتىر. بۇل ءبىزدىڭ قۋانتادى. اۋىل شارۋاشىلىعى جارمەڭكەسىنە 200 ميلليون تەڭگەدەن استام سومانى قۇرايتىن 500 توننادان استام ءونىم اكەلىندى.

ونىڭ ىشىندە 80 توننا ەت، 28 توننادان استام ءسۇت جانە ءسۇت ونىمدەرى، 4 توننادان استام بالىق، 20 توننا ۇن، 41,3 توننا كوكونىس جانە وزگە دە اۋىل شارۋاشىلىق ونىمدەرى جەتكىزىلدى. سونداي- اق، باقشا اعاشىنىڭ كوشەتتەرى جەتكىزىلدى»، - دەدى اقمولا وبلىسىنىڭ اكىمى ەرمەك مىرجىقپايەۆ جارمەڭكەدە.

اكىمنىڭ ايتۋىنشا، جارمەڭكەدە 50 دەن استام ازىق-تۇلىك ءتۇرىن بازار نارىعىنان 10-15 پايىز تومەن باعادا ساتىلۋدا.

ۇيىمداستىرۋشىلاردىڭ مالىمەتىنشە، جارمەڭكەگە اقمولا وبلىسىنىڭ 2 قالا مەن 17 اۋدانداعى كاسىپورىندار ءوز ونىمدەرىن ۇسىنىپ جاتىر. ولاردىڭ اراسىندا «گورمولزاۆود» ج ش س، «سادوۆوە» ج ش س، «ناتيجە» ج ش س، «رودينا» اگروفيرماسى» ج ش س، «يجيەۆسكي» وندىرىستىك كووپەراتيۆى» ج ش س، «بيجان» ەت وڭدەۋ كاسىپورىن» ج ش س، «كراسنويار شۇجىعى» ج ش س، «ايبات» ج ش س، «ماكينسك قۇس فابريكاسى» ج ش س، «كاپيتال پرودجەكت» ج ش س بار.

ەكى كۇنگە سوزىلاتىن اۋىل شارۋاشىلىق ونىمدەرى جارمەڭكەسى ەلورداداعى «حان شاتىر» ويىن- ساۋىق الاڭىندا ءوتىپ جاتىر.