ەلوردالىقتار ارىستا بۇلىنگەن 500 ءۇيدى جوندەپ بەرەدى

نۇر-سۇلتان. قازاقپارات - بۇگىن نۇر-سۇلتان قالاسىنان ارىسقا قۇرىلىس ماتەريالدارىنىڭ العاشقى لەگى اتتانادى.

ەلوردالىقتار جارىلىستان زاقىم كەلگەن 500 ءۇيدى جوندەپ بەرۋگە مىندەت الىپ وتىر، دەپ حابارلايدى قازاقپارات ءتىلشىسى.

بۇل تۋرالى نۇر-سۇلتان قالالىق قازاقستان حالقى اسسامبلەياسىنىڭ كەزەكتى سەسسياسىندا ايتىلدى. ەلوردالىق ق ح ا ءتوراعاسى التاي كولگىنوۆتىڭ ايتۋىنشا، جارىلىس بولعان كۇننەن باستاپ استانالىقتار ارنايى شوتقا تەك بىركۇندىك ەڭبەكاقى ەسەبىنەن 200 ميلليون تەڭگە اۋدارعان.

«ارىسقا بۇكىل ەل بولىپ كومەكتەسىپ جاتىر. قالالىق دوستىق ۇيىندە كومەك جينايتىن ورتالىق اشىلدى. تۇرعىندار بەلسەندىلىك تانىتۋدا. اسىرەسە، اسسامبلەيا مۇشەلەرى بەلسەندى.

«نۇر-سۇلتان ارىسپەن بىرگە!» دەگەن اكسيا جاريالادىق. بۇگىن قالا اكىمىنىڭ ورىنباسارى باستاعان كومەكشى توپتىڭ العاشقى لەگى ارىسقا ۇشادى. ونىڭ قۇرامىندا قۇرىلىس ماماندارى مەن مەردىگەر ۇيىم وكىلدەرى بار. بىزگە تيگەن تۇرعىن ءۇي سەكتورىندا 500 ءۇي ورنالاسقان. سونى جوندەپ، ارىستىق وتانداستارىمىزعا وتكىزۋىمىز كەرەك. جوندەۋ جۇمىستارى بۇگىن-اق باستالىپ كەتەتىنىن سەنىممەن ايتامىن»، - دەدى التاي كولگىنوۆ.

ونىڭ ايتۋىنشا، «نۇرلى استانا» قورى ارىسقا كومەك كورسەتۋ ءۇشىن گۋمانيتارلىق كومەك جيناپ جاتىر. بۇل ىسكە ەلوردالىق كاسىپكەرلەر ۇلەس قوسۋدا.

«بۇعان قوسا، ارىستىق 500 بالانى استاناعا شاقىرىپ وتىرمىز. ولاردى ەلورداعا اكەلىپ، كورىكتى جەرلەردى ارالاتامىز، ءتۇرلى مادەني شارالار ۇيىمداستىرامىز»، - دەدى ول.