تۇركىستان وبلىسىنان استاناعا 500 توننا ازىق- تۇلىك جونەلتىلدى

 تۇركىستان. قازاقپارات - تۇركىستان وبلىسىنان استاناعا ازىق- تۇلىك ونىمدەرى تيەلگەن كەرۋەن اتتاندى. 496 توننا اۋىل شارۋاشىلىعى تاۋارلارى قىركۇيەك ايىنىڭ 22-23 كۇندەرى ەلوردادادا وتەتىن تۇركىستان وبلىسى تاۋاروندىرۋشىلەرىنىڭ كەزەكتى جارمەڭكەسىندە ساۋدالانادى، دەپ حابارلايدى قازاقپارات ءتىلشىسى.

استانا قالاسىنىڭ 20 جىلدىق مەرەكەسىنە وراي ۇيىمداستىرىلىپ وتىرعان شاراعا جالپى قۇنى 201 ميلليون تەڭگەنى قۇرايتىن ازىق- تۇلىك ونىمدەرى جولداندى. اتاپ ايتقاندا، 80 توننا ەت ونىمدەرى، 141 توننا كوكونىس، 28 توننا ءسۇت جانە 90 توننا باقشا ونىمدەرى، 53 توننا جەمىس- جيدەك، 26 توننا كارتوپ جونەلتىلدى.

سونداي- اق، 10 مىڭ دانا جۇمىرتقا جانە 5 توننا بالىق، 4 توننا بال، 10 توننا كەپتىرىلگەن جەمىس، 14 توننا ءتۇرلى كونسەرۆىلەر جانە 45 توننا باسقا دا ونىمدەر بار. وبلىستىق اۋىل شارۋاشىلىعى باسقارماسى باسشىسىنىڭ مىندەتىن ۋاقىتشا اتقارۋشى نۇربەك بادىراقوۆتىڭ ايتۋىنشا، جارمەڭكەدەگى تاۋارلار بازار نارقىنان 10-15 پايىز تومەن باعادا ساتىلماق.

«وتاندىق ونىمدەرىمىز قالا تۇرعىندارى مەن قوناقتارىنا جارمەڭكە ارقىلى ۇسىنىلادى. تۇركىستان وبلىسى استانا قالاسىنىڭ 20 جىلدىق مەرەكەسى اياسىندا وسىمەن 4- رەت جارمەڭكە وتكىزىپ وتىر. وسى ارالىقتا ەلورداعا  14753 توننانى قۇرايتىن اۋىل شارۋاشىلىعى ونىمدەرىنىڭ 28 ءتۇرى جونەلتىلدى. وسى شارانى وتكىزۋگە ءوڭىرىمىزدىڭ 35 ءىرى جانە قوسالقى شارۋا قوجالىقتارى مەن كاسىپورىندارى اتسالىسۋدا» ، - دەدى نۇربەك بادىراقوۆ.

جالپى، بيىل تۇركىستاندىق شارۋالار 500 مىڭ تونناعا جۋىق ءونىمدى رەسەي، بەلارۋس، لاتۆيا، گەرمانيا مەملەكەتتەرىنە ەكسپورتتاسا، 1 ميلليون توننا تاۋار ەلىمىزدىڭ سولتۇستىك وڭىرلەرىنە جونەلتىلدى.