وتاندىق اۆياكومپانيالاردا جىل سايىن 500-600 مامان قاجەتتىلىگى تۋىنداۋى مۇمكىن
17 تامىز 15:31

وتاندىق اۆياكومپانيالاردا جىل سايىن 500-600 مامان قاجەتتىلىگى تۋىنداۋى مۇمكىن

نۇر- سۇلتان. قازاقپارات - رەسمي مالىمەتتەرگە سايكەس، قازىر ەلدىڭ ازاماتتىق اۆياتسيا سالاسىندا 20 مىڭعا جۋىق ادام جۇمىس ىستەيدى.

سالانىڭ دامۋىنا بايلانىستى 2025 -جىلعا قاراي قىزمەتكەرلەرگە دەگەن سۇرانىس سانى جىل سايىن 500-600 ادام بولۋى مۇمكىن، دەپ حابارلايدى قازاقپارات ق ر ي ي د م باسپا ءسوز قىزمەتىنە سىلتەمە جاساپ.

يندۋستريا جانە ينفراقۇرىلىمدىق دامۋ مينيسترلىگىنىڭ «اشىق ساعات الاڭىنداعى» كەزەكتى جيىن وتاندىق اۆياتسيا سالاسىنداعى ماڭىزدى ماسەلەلەرگە ارنالدى. قازاقستاندىق اۋە كومپانيالارى مەن ازاماتتىق اۆياتسيا اكادەمياسىنىڭ وكىلدەرىنىڭ قاتىسۋىمەن وتكەن باسقوسۋدا سالانىڭ كادرلىق الەۋەتىن ارتتىرۋ تارازلاندى.

رەسمي مالىمەتتەرگە سايكەس، قازىر ەلىمىزدەگى ازاماتتىق اۆياتسيا سالاسىندا 20 مىڭعا جۋىق ادام جۇمىس ىستەيدى. ونىڭ 10 مىڭى اۋەجايلاردا، 2857 مامان ۇشقىشتار قۇرامىندا ەڭبەك ەتەدى. ال، ينجەنەرلىك- تەحنيكالىق قۇرامداعى جۇمىسشىلار سانى - 1767. دەسە دە، سالانىڭ دامۋىنا بايلانىستى 2025 -جىلعا قاراي قىزمەتكەرلەرگە دەگەن سۇرانىس سانى جىل سايىن 500-600 ادام بولادى دەگەن بولجام جاسالىپ وتىر.

ەلىمىزدە سەرتيفيكاتتالعان 25 اۆياتسيالىق وقۋ ورتالىعى بار. اتالعان مەكەمەلەر ۇشقىشتار، ينجەنەرلىك جانە اۋە قوزعالىسىن ديسپەتچەرلىك قىزمەت كورسەتۋ قۇرامى مەن اۆياتسيالىق ستانتسيا وپەراتورلارىن العاشقى دايارلاۋ، قايتا دايارلاۋ جانە بىلىكتىلىگىن جەتىلدىرۋ باعىتىندا قىزمەت كورسەتەدى.

ال، ازاماتتىق اۆياتسيا اكادەمياسى - سالاعا قاجەتتى ماماندار دايارلايتىن ەلىمىزدەگى بىردەن- ءبىر جوعارى وقۋ ورنى. باسقوسۋ بارىسىندا وتاندىق اۋە كومپانيالارعا ءوز قىزمەتكەرلەرىن اكادەميادا ۇشاقتاردىڭ ۇشۋ كەستەسى مەن ولارعا تەحنيكالىق قىزمەت كورسەتۋدى جوسپارلاۋ بويىنشا كاسىبي بىلىكتىلىگىن جەتىلدىرۋ ۇسىنىلدى.

اكادەميا وكىلدەرىنىڭ ايتۋىنشا، قازىر وقۋ ورنىندا وتاندىق اۆياتسيا سالاسىنداعى مامانداردىڭ ءبىلىمىن ارتتىرۋ باعىتىندا ارنايى كەشەندى جۇمىستار جۇرگىزىلىپ جاتىر. باستى ماقسات - ءبىلىم بەرۋ باعدارلامالارىن زاماناۋي اۆياكومپانيالاردىڭ تالاپتارىنا سايكەستەندىرۋ.

سونىمەن قاتار، جيىندا اكادەميا تۇلەكتەرىنىڭ اعىلشىن ءتىلى دەڭگەيىن ارتتىرۋ باعىتىندا اتقارىلىپ جاتقان جۇمىستار دا تالقىلاندى.

«ءبىلىم الۋشىلاردىڭ اعىلشىن ءتىلى دەڭگەيىن كوتەرۋ باعىتىندا ءۇش تىلدە ءبىلىم بەرۋدى ەنگىزۋدىڭ ارنايى جول كارتاسى قابىلدانعان. 2023 -جىلى اكادەميادا ءپروفيلدى پاندەر اعىلشىن تىلىندە جۇرگىزىلمەك» ، - دەيدى ازاماتتىق اۆياتسيا اكادەمياسىنىڭ وكىلدەرى.

كەزدەسۋ قورىتىندىسى بويىنشا اكادەميانىڭ وقۋ باعدارلامالارىن اۆياكومپانيالاردىڭ تالاپتارىنا جانە حالىقارالىق ستاندارتتارعا سايكەستەندىرۋ بويىنشا بىرلەسە جۇمىس جۇرگىزۋ تۋرالى شەشىم قابىلداندى.

جاڭالىقتار