ءبىرجان نۇرىمبەتوۆ: قازاقستاندا زەينەتاقى جيناعى 500 مىڭ تەڭگەگە عانا جەتەتىن 5,3 ميلليون ادام بار
بۇل مالىمەتتى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ كەلتىردى، دەپ حابارلايدى قازاقپارات ءتىلشىسى.
«بۇگىنگى تاڭدا بىزدەگى زاڭ بويىنشا ازاماتتار ءوزىنىڭ زەينەتاقى جيناعىن اي سايىن كەلەسى جاعدايلاردا الۋى مۇمكىن: ءوزىڭىز بىلەتىندەي، ەر ادامدار 63، ايەلدەر 59 جاسقا جەتكەن كەزدە، ەكىنشىدەن، ازامات I جانە Ⅱتوپتاعى مۇگەدەك بولىپ سانالسا، ۇشىنشىدەن ەر ادامدار 55 جاسىندا، ايەلدەر 51 جارىم جاستا زەينەتاقىلىق انۋيتەتتى رەتتەسە. زەينەتاقىلىق انتۋيتەت دەگەن جيناقتاۋشى قورداعى جيناقتىڭ جەتكىلىكتى بولۋىنا بايلانىستى بولادى»، - دەدى ءبىرجان نۇرىمبەتوۆ پارلامەنت سەناتىندا ءوتىپ جاتقان دوڭگەلەك ۇستەلدە.
سونىمەن بىرگە، مينيستر زەينەتاقى قورىنان ءبىر مەزگىلدە بارلىق جيناقتى الۋ مۇمكىندىگى دە قاراستىرىلعانىن ايتادى. ياعني، ەگەر قازاقستان ازاماتى شەتەلگە ءبىرجولاتا تۇراقتى تۇرۋعا شىعىپ كەتىپ، ازاماتتىقتى جوعالتسا، ەكىنشىدەن، سالىمشى قايتىس بولسا ونىڭ زەينەتاقى جيناعى مۇراگەرلەرىنە بەرىلەدى. ۇشىنشىدەن I جانە Ⅱتوپتاعى مۇگەدەكتەر مەن زەينەتكەرلەردىڭ جيناعى 12 تومەنگى زەينەتاقى مولشەرىنەن تومەن بولسا بارلىق جيناقتى الۋىنا مۇمكىندىك بار. 2020-جىلى بويىنشا ول سوما - 463 مىڭ تەڭگە.
«بۇگىنگى تاڭدا ءبىرىڭعاي جيناقتاۋشى زەينەتاقى قورىندا جينالعان سالىمدارىمىزدىڭ جالپى قورى - 10 تريلليون 400 ميلليارد تەڭگە. 9,9 ميلليون زەينەتاقىلىق ەسەپشوت بار. سول 9,9 ميلليون ەسەپشوتتا 5,3 ميلليون ادامنىڭ زەينەتاقىلىق جيناعى - 500 مىڭ تەڭگەگە عانا جەتەدى. ودان بولەك، 1,6 ميلليون ادامنىڭ زەينەتاقىلىق جيناعى - 500 مىڭ تەڭگەدەن 1 ميلليون تەڭگەگە دەيىن جينالعان. دەمەك، ءبىزدىڭ ازاماتتاردىڭ 69 پايىزىنىڭ 1 ميلليون تەڭگەگە دەيىن عانا جارنالارى بار. 9,9 ميلليون سالىمشىنىڭ 15 پايىزىنىڭ زەينەتاقى جارنالارى - 1-2 ميلليون تەڭگە ارالىعىندا. سونىمەن جالپى زەينەتاقى سالىمشىلاردىڭ 84 پايىزىنىڭ جيناعى 2 ميلليون تەڭگەگە عانا جەتەدى»، - دەدى ول.