ەسكى ۇلگىدەگى 500 تەڭگەلىك بانكنوتتار 10 - ماۋسىمدا اينالىمنان شىعادى
قاتار اينالىس كەزەڭىندە 2006 -جىلعى ۇلگىدەگى نومينالى 500 تەڭگەلىك بانكنوتتار زاڭدى تولەم قۇرالى بولىپ تابىلادى جانە تولەمدەر مەن اقشا اۋدارىمدارىنىڭ بارلىق تۇرلەرى بويىنشا قازاقستان رەسپۋبليكاسىنىڭ بۇكىل اۋماعىندا قابىلدانۋعا مىندەتتى. 2020 -جىلعى 10 - ماۋسىمعا دەيىن قوسا العاندا ەسكى ۇلگىدەگى بانكنوتتاردى تولەم قۇرالى رەتىندە قابىلداۋدان باس تارتۋعا جول بەرىلمەيدى . زاڭدى تولەم قۇرالى بولىپ تابىلاتىن بانكنوتتار مەن مونەتالاردى قابىلداۋدان باس تارتۋ اكىمشىلىك قۇقىق بۇزۋشىلىق تۋرالى قازاقستان رەسپۋبليكاسى كودەكسىنىڭ 206-بابىن بۇزۋعا اكەپ سوقتىرادى.
ەسكى جانە جاڭا ۇلگىلەردەگى بانكنوتتاردىڭ قاتار اينالىسى كەزەڭىندە 2006 -جىلعى ۇلگىدەگى نومينالى 500 تەڭگەلىك بانكنوتتاردى قابىلداۋدان باس تارتۋ فاكتىلەرى تۋىنداعان جاعدايدا، ءتيىستى شارالار قابىلداۋ ءۇشىن ۇلتتىق بانكتىڭ اۋماقتىق فيليالىنا ءوتىنىش جاساۋ قاجەت. 2020 -جىلعى 10 - ماۋسىمنان كەيىن (كەزەڭ اياقتالعان سوڭ):
- ەكىنشى دەڭگەيدەگى بانكتەر قاتار اينالىس كەزەڭى اياقتالعان كۇننەن باستاپ 12 اي ىشىندە ەسكى ۇلگىدەگى بانكنوتتاردى قابىلدايدى جانە قولدانىستاعى اقشا بەلگىلەرىنە ايىرباستايدى؛
- ۇلتتىق بانكتىڭ فيليالدارى ەكىنشى دەڭگەيدەگى بانكتەردىڭ قابىلداۋ جانە ايىرباستاۋ مەرزىمى اياقتالعان سوڭ تاعى 3 جىل ىشىندە ەسكى ۇلگىدەگى بانكنوتتاردى قابىلدايدى، سونداي- اق ولاردى جاڭا ۇلگىدەگى اقشا بەلگىلەرىنە ايىرباستايدى.
وسىلايشا، 2020 -جىلعى 10- ماۋسىمنان كەيىن 2006 -جىلعى ۇلگىدەگى نومينالى 500 تەڭگەلىك بانكنوتتار زاڭدى تولەم قۇرالى بولىپ تابىلمايدى. سونىمەن بىرگە، 2017 -جىلعى ۇلگىدەگى نومينالى 500 تەڭگەلىك بانكنوتتار اينالىستا بولادى جانە تولەمدەردىڭ بارلىق تۇرلەرى بويىنشا قازاقستان رەسپۋبليكاسىنىڭ بۇكىل اۋماعىندا كورسەتۋلى قۇنى بويىنشا، سونداي- اق بانك شوتىنا ەسەپكە الۋ جانە اۋدارۋ ءۇشىن قابىلداۋعا، بارلىق بانكتەر مەن ۇلتتىق پوشتا وپەراتورى اقشا قۇرالىن ايىرباستاۋعا مىندەتتى بولادى.
اۆتور: الما مۇقانوۆا