وتباسى بانكى العاشقى جارنانى 50 پايىزدان 30 پايىزعا دەيىن تومەندەتپەك

الماتى. قازاقپارات- الداعى ۋاقىتتا وتباسى بانكىنىڭ سالىمشىلارى 30 پايىزدان باستالاتىن العاشقى جارنامەن قۇرىلىس سالۋشىلاردان تۇرعىن ءۇي ساتىپ الا الادى.

بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتى بارىسىندا «وتباسى بانك» ا ق الماتى قالالىق فيليالىنىڭ ديرەكتورى داناگۇل ءتۇسىپوۆا ءمالىم ەتتى، دەپ حابارلايدى قازاقپارات ءتىلشىسى.

«جىل باسىنان بەرى وتباسى بانك قىزمەتكەرلەرى 8400 زاەم بەردى. دەمەك، كۇنىنە 150-160 ادام قولجەتىمدى نەسيەگە ءوتىنىش بەرىپ، قونىس تويىن تويلايدى. بەرىلگەن نەسيەنىڭ تورتتەن ءبىرى الماتىنىڭ ۇلەسىنە تيەسىلى. سونىمەن قاتار، قالا تۇرعىندارى جيناقتاۋ جانە ودان ءارى تۇرعىن ءۇي ساتىپ الۋ ءۇشىن كۇن سايىن 100-دەن استام جاڭا دەپوزيت اشادى. الايدا، ونىڭ ءبارى مەملەكەتتىك باعدارلامالاردىڭ شارتتارىنا سايكەس كەلمەيدى. سول سەبەپتى، ءبىزدىڭ ينۆەستورلارىمىزدىڭ كوپشىلىگى تۇرعىن ءۇيدى كوممەرتسيالىق نارىقتان ساتىپ الادى. قازىر ءبىز قۇرىلىس سالۋشىلارمەن بىرگە جاڭا مەحانيزم ازىرلەۋدەمىز، ونىڭ باستى قۇندىلىعى باستاپقى جارنانى % 50- دان % 30- عا دەيىن تومەندەتۋ. قۇرىلىس كومپانيالارىنان بولىنگەن سۋبسيديالار ونى ازايتۋعا مۇمكىندىك بەرىپ وتىر»، - دەپ ءتۇسىندىردى «وتباسى بانك» الماتى قالاسى بويىنشا فيليالىنىڭ ديرەكتورى داناگۇل ءتۇسىپوۆا.

ايتۋىنشا، الماتىدا وسى ءادىس بويىنشا وتباسى بانك كليەنتتەرىنە قالانىڭ 10 تۇرعىن ءۇي كەشەنىندەگى 850 پاتەر ۇسىنىلادى. تۇرعىندار وزدەرىنە ۇنايتىن نىساندى تاڭداپ، «باسپانا ماركەت» پورتالىندا نەمەسە بانك بولىمشەسىندە پاتەر برونداتىپ، نەسيەگە ءوتىنىش بەرە الادى.

سونداي- اق، وتباسى بانك قازاقستاندىق كاسىپورىندارمەن بىرگە تاعى ءبىر ءونىم - «كورپوراتيۆتى» باعدارلاماسىن ىسكە اسىرۋدا. ونىڭ اياسىندا كومپانيا ءوز قىزمەتكەرلەرىنىڭ باسپانا ماسەلەسىن شەشۋگە كومەكتەسەدى.

«وسى ىنتىماقتاستىق اياسىندا نەسيە مولشەرلەمەسى % 7- دان % 8,5- عا دەيىن (ج ت س م % 7,4- دان) بولادى. بۇل رەتتە كومپانيا ءوز قىزمەتكەرى ءۇشىن باستاپقى جارنانىڭ ءبىر بولىگىن جيناقتاۋعا كومەكتەسەدى. ول % 20 نەمەسە ءتىپتى % 30 بولۋى مۇمكىن. كومپانيانىڭ مۇنداي قولداۋى جەكە باسپاناعا اپارار جولدى ايتارلىقتاي قىسقارتادى، ياعني جاقىن ارادا قونىس تويىن تويلاۋعا كومەكتەسەدى. بۇل وتباسى بانكىنىڭ «كورپوراتيۆتىك» ءونىمى كاسىپورىندارعا ءوز قىزمەتكەرلەرىنىڭ باسپانا ماسەلەسىن جىلدام شەشۋگە مۇمكىندىك بەرەدى. ال بۇل الەۋمەتتىك پاكەتتى نىعايتىپ، قۇندى كادرلاردى ۇستاپ قالۋدىڭ ءبىر جولى. بۇگىنگى كۇنى «كورپوراتيۆتىك» ءونىمنىڭ كومەگىمەن قازاقستان بويىنشا 1000-عا جۋىق ادام باسپانا ساتىپ الۋعا مۇمكىندىك الدى. بيىل كەزەكتى قونىس تويىن كۇتىپ وتىرمىز»، - دەدى سپيكەر.

اۆتور

الما مۇقانوۆا