قازاقستان حالقىنىڭ 50 پايىزدان استامى - 30 جاسقا تولماعان جاستار – ساراپشى

None
None
نۇر- سۇلتان. قازاقپارات - قازاقستاندىقتاردىڭ 50 پايىزدان استامى جاستار ساناتىنا جاتادى. الداعى رەفەرەندۋم كەزىندە ولاردىڭ پىكىرى ماڭىزدى.

وسى ورايدا ق ر پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ساياسي رەفورمالاردى زەرتتەۋ ءبولىمىنىڭ مەڭگەرۋشىسى ەرمەك توقتاروۆ جاستاردى ايتۋلى شاراعا بەلسەنە قاتىسۋعا شاقىرادى، دەپ حابارلايدى قازاقپارات ءتىلشىسى.

«5-ماۋسىمدا وتەتىن رەفەرەندۋم ەلىمىزدىڭ بولاشاعىنا قاتىستى. ال بولاشاق قازىرگى جاستاردىڭ قولىندا. قازاقستان حالقىنىڭ 51 پايىزى - 30 جاسقا تولماعان ازاماتتار. وسىعان وراي ەلىمىزدە جۇرگىزىلىپ جاتقان جانە جۇزەگە اساتىن رەفورمالاردى قابىلداۋدا جاستاردىڭ پىكىرى ماڭىزدى. جالپى ەلىمىزدەگى قازىرگى جاستاردىڭ دەنى ساياساتتان اۋلاقتاۋ. سول سياقتى جاستار بۇگىندە كەز كەلگەن جايت بويىنشا وي- پىكىرىن اشىق ءارى ەركىن جەتكىزە الادى. مەملەكەت باسشىسى جاستار ساياساتىنا، ياعني ولاردىڭ ەل ومىرىنە ارالاسۋىنا ەرەكشە ءمان بەرىپ وتىر. وعان دالەل - پرەزيدەنت جاستار كادر رەزيەۆرى جوباسىنىڭ ىسكە اسۋى»، - دەدى ەرمەك توقتاروۆ ورتالىق كوممۋنيكاتسيالار قىزمەتى الاڭىندا ساراپشىلاردىڭ قاتىسۋىمەن وتكەن دوڭگەلەك ۇستەلدە.

ساياسات تانۋشىنىڭ پىكىرىنشە، وتاندىق جاستار رەفەرەندۋمعا قاتىسۋ تۋرالى شەشىمىن وي سۇزگىسىنەن وتكىزىپ بارىپ قابىلداعانى ءجون.

«جاستار ەركىندىكتى قالايدى. ول ساياسات نەمەسە باسقا سالاعا قاتىستى بولۋى مۇمكىن. وسى ورايدا قازاقستانعا ساياسي وزگەرىستەر مەن ترانسفورماتسيا قاجەت دەگەن جاستار رەفەرەندۋمعا قاتىسىپ، تاڭداۋ جاساي الادى. سوندىقتان دا 5-ماۋسىم كۇنى جاستار قاۋىمىن تاريحي شارادا كۇتەمىز. جاستارعا ءوتىنىش، رەفەرەندۋمعا جاي عانا قاتىسۋ ءۇشىن ەمەس، ەلىمنىڭ بولاشاقتاعى ساياسي دامۋىنا ۇلەسىمدى قوسامىن دەگەن نيەتپەن كەلسە ەكەن»، - دەيدى ول.

بۇعان دەيىن حابارلاعانىمىزداي ساۋالناما ناتيجەسىندە قازاقستاندىقتاردىڭ 66,4 پايىزى رەفەرەندۋمعا قاتىساتىنى بەلگىلى بولدى.

اۆتور: ءالي يبرايەۆ

سوڭعى جاڭالىقتار