ۇكىمەت داعدارىسقا قارسى شارالاردى ىسكە اسىرۋعا 5,9 تريلليون تەڭگە باعىتتايدى

نۇر- سۇلتان. قازاقپارات - ۇكىمەت داعدارىسقا قارسى شارالاردى ىسكە اسىرۋعا 5,9 تريلليون تەڭگە باعىتتايدى.

بۇل تۋرالى ق ر پرەمەر- ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«ۇكىمەت ەلدەگى الەۋمەتتىك- ەكونوميكالىق تۇراقتىلىق پەن جۇمىسپەن قامتۋدى قولداۋعا باعىتتالعان داعدارىسقا قارسى شارالاردى ىسكە اسىرۋعا 5,9 تريلليون تەڭگە باعىتتايدى. بۇل قاراجات رەسپۋبليكالىق بيۋدجەت ەسەبىنەن - 3,4 تريلليون تەڭگەگە جانە بيۋدجەتتەن تىس قاراجات ەسەبىنەن 2,5 تريلليون تەڭگەگە قامتاماسىز ەتىلدى. نەگىزىنەن شىعىندار حالىقتى جۇمىسپەن قامتۋدى ۇلعايتۋعا، اي سايىنعى كىرىستەردى جوعالتۋىنا بايلانىستى تولەمدەرگە، الەۋمەتتىك تولەمدەرگە، تۇرعىن ءۇي قۇرىلىسىنا جانە مەملەكەت باسشىسىنىڭ باسقا دا تاپسىرمالارى بويىنشا باعىتتالعان»، - دەدى ول.

ءبىرىنشى ۆيتسە- مينيستر دەرەگىنشە، جۇمىسپەن قامتۋدىڭ جول كارتاسىن قارجىلاندىرۋعا 1 ت تريلليون تەڭگە قاراستىرىلعان. ونىڭ ىشىندە رەسپۋبليكالىق بيۋدجەت قاراجاتى ەسەبىنەن - 300 ملرد تەڭگە، بيۋدجەتتەن تىس قاراجات - 700 ميلليارد تەڭگە. وسى قاراجات اياسىندا وڭىرلەردە ينفراقۇرىلىمدىق جوبالار ىسكە اسىرىلىپ، 255 مىڭ جۇمىس ورنى قۇرىلادى.

«اينالىم كاپيتالىن جىلدىق 8 پايىز جەڭىلدىكپەن نەسيەلەۋ جانە «قاراپايىم زاتتار ەكونوميكاسى» باعدارلاماسى بويىنشا جىلدىق 6 پايىز جەڭىلدىكپەن نەسيەلەۋدى ۇلعايتۋ شەڭبەرىندە 1 تريلليون تەڭگە بيۋدجەتتەن تىس قاراجات قاراستىرىلعان. 4,5 ميلليون ادام ەكى اي ىشىندە 42,5 مىڭ تەڭگە مولشەرىندە تولەم الۋدا. بۇل ماقساتقا 380 ميلليارد تەڭگە مەملەكەتتىك الەۋمەتتىك ساقتاندىرۋ قورىنان كوزدەلگەن. تۇرعىن ءۇي قۇرىلىسىن 15 ميلليون شارشى مەترگە جەتكىزۋ ءۇشىن قوسىمشا 390 ميلليارد تەڭگە بيۋدجەتتەن تىس كوزدەرىنەن تارتىلادى» ، - دەدى ءاليحان سمايىلوۆ.