قازاق تىلىنەن ەمتيحان تاپسىراتىن 5-8 جانە 10-سىنىپ وقۋشىلارىنىڭ باعاسى اتتەستاتقا ەنبەيدى
وسىعان بايلانىستى قازاقپارات ءتىلشىسى ەنگىزىلگەلى وتىرعان نورمانىڭ مەحانيزىمى تۋرالى وقۋ- اعارتۋ مينيسترلىگىنەن انىقتاپ كوردى.
«مەملەكەتتىك ءتىلدىڭ مارتەبەسىن ارتتىرۋ، مەڭگەرۋ ساپاسىن كۇشەيتۋ، قولدانۋ اياسىن كەڭەيتۋ ماقساتىندا 2023-2024 وقۋ جىلىنان باستاپ 5-8, 10-سىنىپتاردا قازاق ءتىلى بويىنشا ەمتيحان ەنگىزۋ قاراستىرىلۋدا. بۇل نورما بەكىتىلسە، وندا ول 2023 -جىلدىڭ 1-قىركۇيەگىنەن باستاپ قولدانىسقا ەنەتىن بولادى. قازاق ءتىلى مەملەكەتتىك ءتىل رەتىندە بارلىق ورتا ءبىلىم بەرۋ ۇيىمدارىندا 1-11 سىنىپتاردا مىندەتتى ءپان رەتىندە وقىتىلادى. 9, 11 سىنىپتاردا ءبىلىم الۋشىلاردى قورىتىندى اتتەستاتتاۋ فورماسى مەن مىندەتتى پاندەر وزگەرمەيدى. قازاق تىلىنەن ەمتيحان وقۋ باعدارلاماسىن مەڭگەرۋ ناتيجەسى بويىنشا ستاندارتقا سايكەس جازباشا جانە اۋىزشا نىساندا وتكىزىلەدى»، - دەپ ءمالىم ەتتى مينيسترلىكتىڭ باسپا ءسوز قىزمەتىنەن ءتىلشى ساۋالىنا وراي.
ۆەدومستۆو دەرەگىنشە، ورتا جانە جالپى ورتا ءبىلىم اتتەستاتى بۇرىنعى تارتىپپەن قورىتىندى اتتەستاتتاۋدان وتكەن 9-جانە 11-سىنىپ وقۋشىلارىنا بەرىلەدى. بۇل ورايدا، 9-سىنىپ - 4, 11-سىنىپ وقۋشىلارى 5 ەمتيحان تاپسىرادى.
«9, 11-سىنىپتاردىڭ ءبىلىم الۋشىلارى ءداستۇرلى تۇردە جىل سايىن مىندەتتى ەمتيحانداردىڭ ءبىرى بولىپ تابىلاتىن «قازاق تىلىنەن» قورىتىندى اتتەستاتتاۋ تاپسىرادى. ونىڭ باعاسى اتتەستاتقا جازىلادى. ال قولدانىسقا ەنەتىن 5-8, 10-سىنىپ وقۋشىلارىنىڭ «قازاق ءتىلى» پانىنەن ەمتيحان تاپسىرۋى - ارالىق اتتەستاتتاۋ بولىپ تابىلادى. ونىڭ باعاسى اتتەستاتقا جازىلمايدى»، - دەپ ءتۇسىندىردى ۆەدومستۆودان.