قازاقستاندا 5,7 ميلليون ادام سپورتپەن جۇيەلى تۇردە شۇعىلدانادى - مينيستر
بۇل تۋرالى ق ر مادەنيەت جانە سپورت ءمينيسترى اقتوتى رايىمقۇلوۆا ءمالىم ەتتى، دەپ حابارلايدى قازاقپارات ءتىلشىسى.
«بۇگىنگى تاڭدا دەنە شىنىقتىرۋ جانە سپورتپەن جۇيەلى تۇردە شۇعىلداناتىندار سانىنىڭ تۇراقتى ءوسۋ ءۇردىسى بايقالادى. 2019-جىلدىڭ قورىتىندىسى بويىنشا ولاردىڭ سانى 5,7 ميلليون ادامدى نەمەسە 30,6 پايىزدى قۇرادى. بۇل رەتتە قازاقستاننىڭ الەمنىڭ دامىعان 30 ەلىنىڭ قاتارىنا كىرۋىن قامتاماسىز ەتۋ ءۇشىن دەنە شىنىقتىرۋ جانە سپورتپەن جۇيەلى تۇردە اينالىساتىن ادامداردىڭ سانىن 2025-جىلعا قاراي 35 پايىزعا دەيىن ارتتىرۋ شارالارىن قابىلداۋىمىز قاجەت. سەبەبى بۇقارالىق سپورت ميلليونداعان ادامدارعا ولاردىڭ فيزيكالىق قاسيەتتەرى مەن دەنە مۇمكىندىكتەرىن جاقسارتۋعا، دەنساۋلىعىن نىعايتىپ، ومىرلەرىن ۇزارتۋعا مۇمكىندىك بەرەدى»، - دەدى ا. رايىمقۇلوۆا پارلامەنت ماجىلىسىندەگى ۇكىمەت ساعاتىندا.
ونىڭ سوزىنە قاراعاندا، سالاۋاتتى ءومىر سالتىن ناسيحاتتاۋ مەن بۇقارالىق سپورتتى دامىتۋدىڭ اياسىندا 2019-جىلى جالپى سانى 6,8 ميلليون ادامدى قامتىعان 53 مىڭ ءىس-شارا وتكىزىلدى.
بۇدان بۇرىن حابارلانعانداي، ماجىلىستەگى ۇكىمەت ساعاتىندا دەپۋتات گۇلميرا يسيمبايەۆا حالقىنىڭ 60 پايىزعا جۋىعى سپورتپەن اينالىساتىن ا ق ش، جاپونيا، كانادا سياقتى ەلدەرمەن جانە ەۋروپا ەلدەرىمەن، حالقىنىڭ 55 پايىزىنىڭ سپورتپەن شۇعىلداناتىن رەسەيمەن سالىستىرعاندا، قازاقستاننىڭ كورسەتكىشى تومەن دەڭگەيدە ەكەنىن اتاپ ءوتتى.