سولتۇستىك قازاقستاننان جىل سايىن 5-6 مىڭ ادام كەتىپ جاتىر - قۇمار اقساقالوۆ

نۇر-سۇلتان. قازاقپارات - سولتۇستىك قازاقستاننان جىل سايىن 5-6 مىڭ ادام قونىس اۋدارادى.

ونىڭ كوبى رەسەيگە كوشۋدە.

بۇل تۋرالى سولتۇستىك قازاقستان وبلىسىنىڭ اكىمى قۇمار اقساقالوۆ ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.

«كوشى-قون باعدارلاماسى ءبىز ءۇشىن وتە ماڭىزدى. شىن مانىندە وبلىس تۇرعىندارىنىڭ سانى 5-6 مىڭ ادام كولەمىندە ازايىپ جاتىر. ستاتيستيكانى كورسەڭىزدەر، ونىڭ 89 پايىزى - رەسەيگە كوشىپ جاتقان ازاماتتار. نە سەبەپتى ەكەنى تۇسىنىكتى»، - دەدى ايماق باسشىسى ب ا ق وكىلىنىڭ سۇراعىنا بەرگەن جاۋابىندا.

ونىڭ ايتۋىنشا، قازاقستانعا كەلەمىن، سونىڭ ىشىندە سولتۇستىك قازاقستاننىڭ جەرىندە تۇرامىن دەگەن ازاماتتار دا از ەمەس كورىنەدى.

«جىل باسىنان بەرى وڭتۇستىكتەن، نۇر-سۇلتان قالاسىنان جانە سىرتتان 800 ادام كەلدى. بيىل جالپى 2300 دەن استام ادام كوشىپ كەلەدى دەگەن جوسپار بار. ولاردىڭ ءارقايسىنا بەلگىلەنگەن جان-جاقتى كومەك مەملەكەت تاراپىنان تولەنەدى. ءار وتباسى مۇشەسىنە 70 مينيمالدى كورسەتكىش تولەنەدى. ول - 214 مىڭ تەڭگە كولەمىندە. ال ءۇي ساتىپ الامىن دەگەن ازاماتتارعا 15 مينيمالدىق ەسەپتىك كورسەتكىش مولشەرىندە اقشا تولەنەدى»، - دەگەن اكىم رەسەي مەن ۋكراينداعى جاعدايعا بايلانىستى وڭىرگە قونىس اۋدارعان شەتەلدىكتەردىڭ سانى تۋرالى تۇسىنىكتەمە بەردى.

وبلىس باسشىسىنىڭ ايتۋىنشا، ءدال قازىر رەسەيدەن سولتۇستىك قازاقستان وبلىسىنا قونىس اۋدارۋشىلاردىڭ كوزگە كورىنەتىندەي اعىنى بايقالىپ وتىرعان جوق.

ەسكە سالساق، وسى ايدىڭ باسىندا سولتۇستىك قازاقستاندا ەكى جىل جابىق بولعان شەكارا بەكەتى قايتا اشىلاتىنى حابارلانعان بولاتىن.