قازاقستاننىڭ بيۋجەتى 5,3 تريلليون تەڭگەگە تولىقتى

استانا. قازاقپارات - اعىمداعى جىلدىڭ ىشىندە ەلىمىزدىڭ بيۋجەتى 5,3 تريلليون تەڭگەگە تولىقتىق. ونىڭ 70 پايىزىن، ياعني 3,7 تريلليون تەڭگەسىن سالىق تۇسىمدەرى قامتاماسىز ەتىپ وتىر، دەپ حابارلايدى قازاقپارات ءتىلشىسى finprom.kz سايتىنا سىلتەمە جاساپ.

«2018-جىلدىڭ ءبىرىنشى جارتىجىلدىعىندا مەملەكەتتىك بيۋدجەت 5,3 تريلليون تەڭگەگە تولىقتى. بۇل وتكەن جىلدىڭ سايكەس كەزەڭىمەن سالىستىرعاندا 4,8 پايىزعا (5 تريلليون) ارتىق. مەملەكەتتىك بيۋجەت تولۋىنىڭ نەگىزگى كوزى سالىق تۇسىمدەرى (بارلىق تۇسىمدەردىڭ 69,8 پايىزى) بولدى. ول 13,8 پايىزعا ارتىپ، 3,7 تريلليون تەڭگەنى قۇرادى. ءبىر جىل بۇرىن ونىڭ كولەمى 3,2 تريلليون تەڭگە بولعان ەدى»، - دەپ اتاپ وتەدى باسىلىم.

كىرىستىڭ كەلەسى اۋقىمدى بولىگىن تراسفەرتتەر قۇرايدى. ونىڭ ەسەبىنەن ەلىمىزدىڭ بيۋدجەتى 1,4 تريلليون تەڭگەگە ۇلعايدى. ال سالىقتىق ەمەس تۇسىمدەر مەن نەگىزگى كاپيتالدى ساتۋدان تۇسكەن تۇسىمدەردىڭ جالپى كولەمى 150,6 ميلليارد تەڭگەگە جەتتى.

«سوڭعى 5 جىلدا مەملەكەتتىك بيۋجەت تۇسىمدەرى (قاڭتار-ماۋسىم) 2,1 تريلليون تەڭگەگە نەمەسە 66,8 پايىزعا ارتتى. بۇل رەتتە اعىمداعى جىلدىڭ ءبىرىنشى جارتىجىلدىعى سوڭعى 5 جىلدىڭ ىشىندەگى ەڭ كىرىستى كەزەڭ بولىپ وتىر. 6 ايداعى مەملەكەتتىك بيۋجەتتىڭ ورتاشا كىرىسى 8,8 پايىزدىق قارقىنمەن تۇراقتى ءوسىپ كەلەدى»، - دەلىنگەن حابارلامادا.

سالىق تۇسىمدەرى قۇرىلىمىنداعى نەگىزگى كىرىس كوزدەرى - تاۋلارلار، جۇمىستار مەن قىزمەتتەرگە ارنالعان ىشكى سالىقتار. ول جىل باسىنان بەرگى التى ايدىڭ ىشىندە 1,4 تريلليون تەڭگەنى قۇرادى. تابىس سالىعىنىڭ ءتۇسىمى 1,2 تريلليون تەڭگە بولدى. بۇل وسىدان ءبىر جىل بۇرىنعى كورسەتكىشتەن 6,5 پايىزعا ارتىق. بۇل كاسىپورىندار مەن قىزمەتكەرلەردىڭ تابىسى وسكەندىگىن كورسەتەدى.

حالىقارالىق ساۋدا مەن ىشكى وپەراتسيالاردىڭ جيىنتىق سالىعى 619,4 ميلليارد تەڭگەنى (ءبىر جىل بۇرىن 529,7 ميلليارد تەڭگە بولعان ەدى) قۇرادى.