مەملەكەتتىك تۇرعىن ءۇي «5-20-25» باعدارلاماسىنا كىم قاتىسا الادى

نۇر- سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءبىرىنشى ۆيتسە- ءمينيسترى قايىربەك وسكەنبايەۆ «5-20-25» مەملەكەتتىك تۇرعىن ءۇي باعدارلاماسىنا كىمدەردىڭ قاتىسا الاتىندىعىن ايتتى،

دەپ حابارلايدى قازاقپارات ءتىلشىسى.

«نەگىزگى شارتتاردىڭ ءبىرى ولار اكىمدىكتە باسپانا كەزەگىندە ءتۇرۋى ءتيىس. ءاربىر كەزەك كوپبالالى وتباسى، جەتىم بالالار، مۇگەدەك بالالاردىڭ اتا- اناسى، مەملەكەتتىك، بيۋدجەتتىك قىزمەتشىلەر دەپ جەكە- جەكە ساناتقا بولىنگەن. ءبىراق، ساناتقا بايلانىستى ولاردىڭ شىنىمەن باسپاناعا مۇقتاج الدە مۇقتاج ەمەستىگىن انىقتاۋعا بولمايدى. ماسەلەن، مەنىڭ جالاقىم ماماننىڭ جالاقىسىنا قاراعاندا جوعارى. ال زاڭعا سايكەس، ءبىز كەزەكتە تۇرۋعا قۇقىلىمىز. سوندىقتان كەزەكتە تۇرعانداردى كىرىستەرى بويىنشا بولۋگە شەشىم قابىلدادىق»، - دەدى ول ۇكىمەت ۇيىندەگى باسپا ءسوز ءماسليحاتىندا.

ونىڭ اتاپ وتۋىنشە، بۇل باعدارلاماعا 3,1 ەڭ تومەن كۇنكورىس دەڭگەيىنە دەيىنگى تابىسى بار ازاماتتار (92 مىڭ تەڭگە) قاتىسا الادى. ولارعا نەسيە 25 جىلعا 20 پايىزدىق باستاپقى جارنامەن جىلىنا 5 پايىزدىق مولشەرلەمەمەن بەرىلەدى.

«كىرىسى جوعارى ادامدار «7-20-25» باعدارلاماسىنا قاتىسۋى نەمەسە ەكىنشى دەڭگەيلى بانكتەردىڭ باعدارلاماسى ارقىلى باسپانا الۋلارى قاجەت. مەملەكەتتىك قىزمەتشى ساناتىنا كىرگەنىممەن جالاقىم جوعارى بولعاندىقتان مەملەكەت سۋبسيديالايتىن جەڭىلدىگى بار مەملەكەتتىك باعدارلاماعا قاتىسا المايمىن»، - دەدى قايىربەك وسكەنبايەۆ.

ال «قازاقستاننىڭ تۇرعىن ءۇي قۇرىلىس جيناق بانكى» ا ق باسقارماسىنىڭ ءتوراعاسى ءلاززات يبراگيموۆا «5-20-25» باعدارلاماسىنا قاتىسۋشىلارى جيناق بانكىنەن شوت اشىپ، جارناسىن تولەۋى قاجەتتىگىن ەسكەرتەدى.

سونىمەن قاتار، ۇمىتكەردىڭ سوڭعى 5 جىلدا مەنشىگىندە باسپاناسى بولماۋى ءتيىس.

بۇعان دەيىن قازاقستاندا «5-20-25» باعدارلاماسى باستالعانىن حابارلاعان ەدىك.

اۆتور مارلان جيەمباي