تۇرعىن ءۇي جيناق بانكى «5-20-25» شارتىمەن يپوتەكا بەرەدى

استانا. قازاقپارات - ۇكىمەت «بايتەرەك» حولدينگىن بيۋدجەتتىك قارجىلاندىرۋ تۋرالى قاۋلىنى قابىلدادى. اتالعان قۇجات بويىنشا تۇرعىن ءۇي قۇرىلىس جيناق بانكىنە قوسىمشا قارجى بولىنەدى.

 وعان 20 پروتسەنتتىك العاشقى جارناسى بار ازاماتتار 5 پروتسەنتپەن 25 جىلعا پاتەر نەسيەسىن راسىمدەي الادى، دەپ حابارلايدى قازاقپارات ءتىلشىسى.

ق ر يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەكتىڭ ايتۋىنشا، بۇگىندە تۇرعىن ءۇي قۇرىلىس جيناق بانكىندە 1,3 ميلليون سالىمشى تىركەلگەن. ولاردىڭ اقشاسى 660,6 ميلليارد تەڭگەگە جەتتى. سونىڭ ىشىندە  44700 سالىمشى پاتەر سوماسىنىڭ 20 پروتسەنتىن جيناپ قويدى.

«جالپى، بۇگىندە تۇرعىن ءۇي قۇرىلىس جيناق جۇيەسى باسپانا الۋدىڭ ەڭ ءتيىمدى ينسترۋمەنتتەردىڭ ءبىرى بولىپ وتىر. سالىمشىلارعا بەرىلەتىن زايمدار باستاپقى جارناسى 20 پروتسەنتكە دەيىن بولعان جاعدايدا 25 جىلعا 5 پروتسەنتكە بەرىلەدى. مىسالى، قۇنى 8,4 ميلليون تەڭگە بولاتىن پاتەردىڭ، ول شامامەن 60 شارشى مەتردى قۇرايتىن ەكى بولمەلى باسپانانىڭ اي سايىنعى تولەمى 60 مىڭ تەڭگەنى قۇرايتىن بولادى. بولىنگەن قارجى ءبىر جىلدىڭ ىشىندە  3111  سالىمشىعا قولجەتىمدى زايم الۋعا مۇمكىندىك بەرەدى. بۇل قارجى 15 جىلدا 3 رەت اينالىمدا بولادى، ياعني تاعىدا 6 سالىمشىعا زايم بەرىلەتىن بولادى»، - دەدى ج. قاسىمبەك ۇكىمەتتىڭ بۇگىنگى وتىرىسىندا.

 مينيسترلىكتىڭ مالىمەتىنە سايكەس، «نۇرلى جەر» مەملەكەتتىك باعدارلاماسى اياسىندا تۇرعىن ءۇي قۇرىلىس جيناق بانكىنىڭ سالىمشىلارىن نەسيەلەۋ ءۇشىن 2017-2021 -جىلدارى ارالىعىندا 120 ميلليارد تەڭگە قاراستىرىلعان. بيىل اتالعان قارجىنىڭ 28 ميلليارد تەڭگەسى يگەرىلەدى. بيۋدجەتتىك كرەديت بانككە 0,15 پروتسەنتپەن 20 جىلعا بەرىلەدى.

ايتا كەتەيىك، «7-20-25» باعدارلاماسى قابىلدانعاننان كەيىن تۇرعىن ءۇي قۇرىلىس جيناق بانكى نەسيە بەرۋ شارتتارىن قايتا قارايتىنىن مالىمدەگەن بولاتىن. ماسەلەن، اسكەري ازاماتتار جانە ارنايى ورگان قىزمەتكەرلەرىنە ارنالعان «5-5-25» - ءتىڭ جوباسى ۇسىنىلدى. بۇدان بولەك، كرەديتتىك باسپانانى ساتىپ الۋدى كوزدەيتىن «5-20-15» شارتتارى قارالدى.

اۆتور: ارمان اسقاروۆ