قازاقستاندىقتار جەكە كۋالىكتى 5-10 مينۋت ىشىندە الاتىن بولادى – مۋسين
بۇل تۋرالى ءوزىنىڭ Facebook پاراقشاسىندا ق ر سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى باعدات مۋسين جازدى، دەپ حابارلايدى قازاقپارات.
«ءبىز ىشكى ىستەر مينيسترلىگىمەن بىرگە بىرتىندەپ ارنايى تەرمينالداردى قولدانىسقا ەنگىزەمىز، ءسويتىپ قۇجاتتاردى ميگراتسيا ماماندارىنا جۇگىنبەي- اق، تەرمينال ارقىلى رەسىمدەۋگە بولادى»، - دەپ جازدى مينيستر.
سوندا- اق ول سوزىندە كەشە ۇكىمەت وتىرىسىندا مەملەكەتتىك قىزمەتتەردى سيفرلاندىرۋ بارىسى تۋرالى ايتىپ، سوسىن سەنات دەپۋتاتتارى الدىندا جاڭا زاڭ جوباسى بويىنشا بايانداما جاساعانىن جازدى.
«زاڭ جوباسىندا يننوۆاتسيا، سيفروۆيزاتسيا جانە اقپاراتتىق قاۋىپسىزدىك سالاسىنا وزگەرىستەر مەن ونلاين- قىزمەتتەردى جىلدامىراق ەنگىزۋدى كوزدەيتىن ءىس- شارالار قاراستىرىلعان. ءبىرىنشى كەزەكتە، مەملەكەتتىك اپپاراتتى بيۋروكراتيادان ارىلتۋ، ياعني ادامي فاكتوردى ازايتىپ، قىزمەت كورسەتۋ ۋاقىتىن قىسقارتۋعا باعىتتالعان. پلاتفورمالىق مودەل مەن ءبىرىڭعاي ارحيتەكتۋرا قالىپتاستىرۋ ارقىلى شىعىنى كوپ شاشىراڭقى اقپاراتتىق جۇيەلەردى رەتتەپ، قاجەتسىز بازالاردى قىسقارتۋعا بولادى. ناتيجەسىندە، مەملەكەتتىك قىزمەتتەردى كورسەتۋ جىلدامدىعى ارتىپ، ازاماتتارعا دا، مەملەكەتتىك ورگاندارعا دا قولايلى جانە ءتيىمدى جاعداي جاسالادى. شالعاي اۋىلداردا تۇراتىن قازاقستاندىقتار ءۇشىن «سيفرلىق نۇكتەلەر» اشىلادى.
بۇل ماسەلەنى قازپوشتادا جۇمىس ىستەپ جۇرگەندە كوتەرگەن ەدىم. بارىنە بەلگىلى، قازاقستاننىڭ تۇكپىر- تۇكپىرىندە، ءتىپتى ەڭ شالعاي اۋىلدارىندا قازپوشتانىڭ عانا بولىمشەلەرى بار، سوندىقتان وسى بولىمشەلەردە تەك پوشتا قىزمەتتەرى ەمەس، مەملەكەتتىك قىزمەتتەردى دە ۇسىنىلاتىن بولادى. ايتپەسە تۇرعىندار قالاداعى نەمەسە اۋدان ورتالىعىنداعى ح ق ك و- عا بارۋعا ءماجبۇر. سيفرلىق قۇجاتتار ماسەلەسىنە كەلسەك، زاڭدا سيفرلىق قۇجاتتار قاعاز نۇسقامەن تەڭ دارەجەدە قولدانىلاتىنى تۋرالى نورما قاراستىرىلعان. سونداي- اق جۋىردا قازاقستاندىقتار جەكە كۋالىكتى 5-10 مينۋتتىڭ ىشىندە الا الاتىن بولادى. ءبىز ءى ءى م- مەن بىرگە بىرتىندەپ ارنايى تەرمينالداردى قولدانىسقا ەنگىزەمىز، ءسويتىپ قۇجاتتاردى ميگراتسيا ماماندارىنا جۇگىنبەي- اق، تەرمينال ارقىلى رەسىمدەۋگە بولادى»، - دەيدى باعدات مۋسين.
ونىڭ سوزىنشە، الىس ەلدى مەكەندەردى بايلانىسپەن قامتۋ ماسەلەسىنە كەلسەك، بايلانىس جەلىسىن ەلەكتر جەتكىزۋ جەلىلەرىنىڭ باعاندارى ارقىلى وتكىزۋ مۇمكىندىگىن قاراستىرىپ جاتىرمىز. ياعني ەلەكتر جەتكىزۋ جەلىلەرى بار جەرگە بايلانىس تا وتكىزىلەدى. ال، مۇنداي مۇمكىندىك بولماعان جەرلەرگە سپۋتنيك ارقىلى جەتكىزەتىن بولامىز. الەۋمەتتىك سالاداعى سيفرلاندىرۋ جۇمىستارىنىڭ قارقىنى دا باسەڭدەمەۋى ءتيىس.
بۇعان دەيىن مۇگەدەكتىكتى راستايتىن قۇجات الۋ ءۇشىن بىرنەشە مەكەمەنى ارالاپ، ءتۇرلى انىقتامالار جيناۋ كەرەك بولاتىن. ءبىز بۇل پروتسەستى قايتا قاراستىردىق، ەندى كوپ ۇزاماي ەرەكشە قاجەتتىلىگى بار تۇلعالار مۇگەدەكتىگىن كۋالاندىرۋ ءۇشىن ءتۇرلى مەكەمەلەردى ارالاماي- اق، ءبىر عانا مەكەمەگە - وزدەرىنىڭ ەمحانالارىنا جۇگىنەتىن بولادى. كوپبالالى انالارعا دا جاردەماقى پرواكتيۆتى تۇردە تاعايىندالادى. ەندى ولار جاردەماقى رەسىمدەۋ ءۇشىن قۇجات جيناپ جۇرمەيدى، قىزمەت اۆتوماتتى تۇردە كورسەتىلەدى.
«پروتسەستى اشىق جانە جاريالى جۇرگىزۋگە جول اشىلادى. مىسالى، القا بيلەردى ىرىكتەۋ پروتسەسى اۆتوماتتاندىرىلادى، كومىرسۋتەك شيكىزاتى بويىنشا جەر قويناۋىن پايدالانۋ قۇقىعىن بەرۋگە ارنالعان اۋكتسيوندار ەلەكتروندى تۇردە وتكىزىلەدى. جاڭا زاڭ جوباسىنىڭ باستى مىندەتى - ازاماتتار مەن مەملەكەتتىك ورگانداردىڭ ءوزارا بايلانىسىن نىعايتۋ. ارىز- شاعىمدار، وتىنىشتەر مەن باسقا دا قۇجاتتاردى ءاپ- ساتتە جولداۋعا بولادى. وسى ەكى كەزدەسۋدى قورىتىندىلاسام، ءبىزدىڭ جۇمىسىمىز ەڭ باستى ەكى قاعيداتقا - پرواكتيۆتى جانە «ادامعا باعدارلانعان» جوبالارعا نەگىزدەلگەن. سەناتورلار ءبىزدىڭ زاڭ جوباعا قولداۋ كورسەتكەنىنە قۋانىشتىمىز»، - دەلىنگەن جازبادا.