ەۋروپا ليگاسى: «استانا» قارسىلاسىنان 5:0 مەن جەڭىلىپ قالدى
ەستەرىڭىزگە سالا كەتەلىك، L توبىندا سىنعا ءتۇسىپ جاتقان ەكى كوماندا 24- قازاندا گوللانديادا ءوزارا كەزدەستى. بۇل ويىندا «از الكمار» كلۋبى «استانانى» 6:0 ەسەبىمەن ويسىراتا جەڭگەن بولاتىن. سوندىقتان بۇگىنگى كەزدەسۋدە ەلوردالىق كلۋب قارىمتا قايتارۋعا كۇش سالاتىنى بەلگىلى ەدى.
«استانا» ءۇش تۋر بويى بىردە-ءبىر ۇپاي جيناعان جوق. قارسىلاستار قاقپاسىنا نەبارى ءبىر عانا گول سوقتى. وسىعان بايلانىستى جانكۇيەرلەر الدىندا جاقسى ويىن ورنەگىن كورسەتۋى ءتيىس ەدى.
«از الكمار» الاڭ يەلەرىنىڭ ىعىنا جىعىلىپ كەتە قويعان جوق. ەسەسىنە قازاقستاندىق كلۋبتىڭ قاقپاسى ماڭىندا ءجيى بوي كورسەتتى. قاۋىپتى ساتتەر ۇيىمداستىردى. ەلوردالىق كلۋب قورعاۋشىلار تاراپىنان ورەسكەل قاتەلىكتەر ورىن الىپ جاتتى. وسىنداي ساتتەردىڭ بىرىندە 29-مينۋتتا 18 جاستاعى ميرون بواديۋ «استانا» قاقپاسىنان ساڭىلاۋ تاۋىپ كەتتى. ايتا كەتەرلىگى، ول گوللانديادا وتكەن العاشقى كەزدەسۋدە دە گول سوققان بولاتىن. ال گوللانديالىق كوماندا قاتارىنان فرەدريك ميدتشە 52، ۋساما يدريسسي 57-مينۋتتا مەرگەندىك تانىتتى. سونداي-اق، 75-مينۋتتا پانتەليس حاتسەدياكوس گول سوقسا، 77-مينۋتتا ميرون بواديۋ تاعى دا ءوز مەرگەندىگىن كورسەتتى. وسىلايشا قارسىلاسىنا 0:5 ەسەبىمەن ەسە جىبەردى. ءسويتىپ اتالمىش كوماندادان ەكى كەزدەسۋ بارىسىندا 11 گول جىبەرىپ الدى.
«استانا» بيىل ەۋروپا ليگاسىندا ءتورتىنشى جىل سىنعا ءتۇسىپ كەلەدى. ونىڭ ەشبىرىندە مۇنداي تومەنگى ناتيجە كورسەتكەن ەمەس. ەلوردالىق سوڭعى رەت ءوز الاڭىندا 2014-جىلى يسپانيانىڭ «ۆيلياررەال» كومانداسىنان 0:3 ەسەبىمەن ويسىراي جەڭىلگەن ەدى. ەندەشە، قازاقستاندىق كلۋب بەس گول ايىرماسىمەن تۇڭعىش رەت قارسىلاسىنا ەسە جىبەرىپ وتىر.
سونداي-اق، بۇگىن اتالمىش توپتا انگليانىڭ «مانچەستەر يۋنايتەد» جانە سەربيانىڭ «پارتيزان» كوماندالارى كەزدەسەدى. ويىن نۇر-سۇلتان ۋاقىتىمەن 01.00 دە باستالادى.
«استانا» ەندى ەكى ويىن وتكىزەدى. ەلوردالىق كلۋب 28- قاراشادا انليانىڭ «مانچەستەر يۋنايتەد» كومانداسىن قابىلداسا، 12- جەلتوقساندا سەربيادا «پارتيزان» كلۋبىمەن كەزدەسەدى.