ەلىمىزدە تۇڭعىش رەت جاس جازۋشىلار مەن اقىندارعا 4 ميلليون تەڭگە پرەزيدەنتتىك ارناۋلى ادەبي سىيلىق بەرىلەدى

استانا. قازاقپارات - ەلىمىزدە بيىل تۇڭعىش رەت دارىندى جاستارعا مەملەكەتتىك قولداۋ كورسەتۋ، اقىن-جازۋشىلاردىڭ جاڭا بۋىنىن قالىپتاستىرۋ ماقساتىندا پرەزيدەنتتىك ارناۋلى ادەبي سىيلىق تابىستالادى.

بۇل تۋرالى جاس قالامگەرلەرمەن كەزدەسۋ بارىسىندا مادەنيەت جانە سپورت ءمينيسترى اسحات ورالوۆ مالىمدەدى، دەپ حابارلايدى قازاقپارات.

پرەزيدەتتىك ادەبي سىيلىق نەگىزگى 4 نوميناتسيا بويىنشا ۇزدىكتەردى انىقتايدى. ۇمىتكەرلەر «پروزا»، «پوەزيا»، «دراماتۋرگيا» جانە «بالالار ادەبيەتى» بويىنشا ءوز ەڭبەكتەرىن ۇسىنا الادى. ءار نوميناتسيادا جەڭىمپازعا 4 ميلليون تەڭگە سىياقى جانە «پرەزيدەنتتىك ارناۋلى ادەبي سىيلىقتىڭ لاۋرەاتى» اتاعى، ديپلوم جانە توسبەلگى بەرىلەدى.

ادەبي سىيلىققا 18-35 جاس ارالىعىنداعى قالامگەرلەر ۇمىتكەر بولا الادى. وتىنىمدەر 2023-جىلعى 1- ماۋسىمنان 30- ماۋسىمعا دەيىن، قاعاز جانە ەلەكتروندى نۇسقادا قابىلدانادى. باستى شارت - پرەزيدەنتتىك ادەبي سىيلىققا ۇسىنىلاتىن جۇمىس وسىعان دەيىن حالىقارالىق جانە ۇلتتىق بايقاۋلارعا قاتىسپاعان، تىڭ تۋىندى بولۋى كەرەك.

«مۇنداي باستامالار وتاندىق ادەبيەتتى دامىتۋ ءۇشىن عانا ەمەس، قازاق تىلىندەگى كونتەنتتى كوبەيتۋ ءۇشىن، اسىرەسە بالالار ادەبيەتى سالاسىنداعى كونتەنتتى كوبەيتۋ ءۇشىن قاجەت. بۇگىندە مينيسترلىك تەاتر ونەرىنە ۇلكەن كوڭىل ءبولىپ وتىر. ءبىزدىڭ ماقساتىمىز - وتاندىق اۆتورلاردىڭ قويىلىمدارىنىڭ سانىن ارتتىرۋ. بۇل ماقساتقا قول جەتكىزۋ ءۇشىن جاس دراماتۋرگتەر ماڭىزدى ءرول اتقاراتىنىنا سەنىمدىمىن»، - دەدى مادەنيەت جانە سپورت ءمينيسترى اسحات ورالوۆ.