جاپونيادا جەرگىلىكتى شەنەۋنىكتىڭ ۇلى 4 ادامدى ءولتىردى دەگەن كۇدىكپەن قامالدى

None
ناگانو. KYODO- قازاقپارات - جاپونيادا جەرگىلىكتى شەنەۋنىكتىڭ ۇلى ءتورت ادامدى ءولتىردى دەگەن كۇدىكپەن قاماۋعا الىندى، دەپ حابارلايدى قازاقپارات Kyodo اگەنتتىگىنە سىلتەمە جاساپ.

كۇدىكتى 31 جاستاعى ماسانوري اوكي - ناگانو پرەفەكتۋراسى ناكانو قالاسىنداعى قالالىق جينالىستىڭ سپيكەرى ماساميچي اوكيدىڭ ۇلكەن ۇلى. پوليتسيانىڭ حابارلاۋىنشا، ول ەكى پوليتسيا قىزمەتكەرىن اتىپ ولتىرگەن جانە تاعى ەكى ادامدى پىشاقتادى دەگەن كۇدىكپەن قاماۋعا الىندى.

وقيعا پرەفەكتۋرا استاناسى ناكانونىڭ سولتۇستىك- شىعىسىنداعى قالادا بولدى. پوليتسياعا جەرگىلىكتى ۋاقىت بويىنشا ساعات 16:25 شاماسىندا ەر ادامنىڭ ايەلدى پىشاقتاعانى تۋرالى جەدەل قوڭىراۋ تۇسكەن. دالادا جۇمىس ىستەپ جۇرگەن كۋاگەر جەرگىلىكتى ۋاقىت بويىنشا ساعات 16:00 شاماسىندا شابۋىلداۋشىنىڭ كومەككە شاقىرعان ايەلدى قۋىپ كەلە جاتقانىن كورگەن. كامۋفلياج، قالپاق، كۇننەن قورعايتىن كوزىلدىرىك جانە بەتپەردە كيگەن كۇدىكتى ايەلدىڭ قولىنان ۇستاپ، ۇزىندىعى 30 سانتيمەتردەي پىشاقتى ارقاسىنا سۇعىپ العان. كۋاگەردىڭ ايتۋىنشا، قاسكۇنەم ايەل جەرگە قۇلاپ بارا جاتقاندا كەۋدەسىنە تاعى دا پىشاق سۇققان. شابۋىل جاساعان ادام كەتىپ قالعان سوڭ، 72 جاستاعى كۋاگەر 150 مەتردەي جەردەگى ۇيىنە جۇگىرىپ، پوليتسياعا حابارلاعان. كەيىنىرەك پوليتسيا ايەلدىڭ قايتىس بولعانىن حابارلادى. ونىڭ 66 جاستاعى يۋكي مۋراكامي ەكەنى انىقتالدى. سونداي- اق، 70 جاستاعى تاعى ءبىر ايەل - ياسۋكو تاكەۋچيدىڭ سول ماڭدا جاراقاتتانىپ، كەيىننەن كوز جۇمعانى بەلگىلى بولدى.

كۇدىكتى وقيعا ورنىنا جەتكەن پوليتسەيلەرگە وق اتىپ، 46 جاستاعى ينسپەكتور يوشيكي تاما جانە 61 جاستاعى سەرجانت تاكۋو يكەۋچي قايتىس بولدى.

كەيىن كۇدىكتى اكەسى - قالالىق جينالىس سپيكەرىنىڭ ۇيىنە كىرىپ العان. پوليتسەيلەر ونى بەرىلۋگە كوندىرگەن.

سوڭعى جاڭالىقتار