ساۋد ارابياسى 4 كۇندىك جۇمىس اپتاسىنا كوشۋدى قاراستىرىپ جاتىر

استانا. قازاقپارات - ساۋد ارابياسى جۇمىس اپتاسىن قىسقارتىپ، ءۇش دەمالىس كۇنىن ەنگىزۋ مۇمكىندىگىن قاراستىرىپ جاتىر.

بۇل تۋرالى ەلدىڭ ادام رەسۋرستارى جانە الەۋمەتتىك دامۋ مينيسترلىگى ءمالىم ەتتى، دەپ حابارلايدى قازاقپارات Al Arabia ارناسىنا سىلتەمە جاساپ.

الەۋمەتتىك جەلىدەگى ساۋالعا مينيسترلىكتىڭ Twitter- دەگى قولداۋ توبى قازىرگى ۋاقىتتا جۇمىس جۇيەسى قايتا قارالىپ، دەمالىستى ەكى كۇننەن ءۇش كۇنگە ۇزارتۋ مۇمكىندىگىن قاراستىرىپ جاتقانىن ايتتى.

وزگەرىستەر مينيسترلىكتىڭ بىرنەشە رەت باعالاۋىمەن قارالادى.

ساراپشىلار جۇمىس ورىندارىنىڭ سانىن ۇلعايتۋ جانە جەرگىلىكتى جانە حالىقارالىق ينۆەستيتسيالار ءۇشىن ەڭبەك نارىعىنىڭ تارتىمدىلىعىن ارتتىرۋ جولدارىن ساراپتايدى.

جۇمىس اپتاسىن قىسقارتۋ قۇجاتىنىڭ جوباسى قوعامدىق تالقىلاۋعا ارنالعان ساۋالناما پلاتفورماسىندا دا بار.

جوبا جۇزەگە اسسا، ساۋد ارابياسى قىسقارتىلعان جۇمىس اپتاسىن ەنگىزگەن بىرىككەن اراب امىرلىكتەرىنەن كەيىنگى ەكىنشى ەل بولادى.

2022-جىلدىڭ 1- قاڭتارىندا ب ا ءا جاڭا 4½ كۇندىك جۇمىس اپتاسىنا اۋىسىپ، دەمالىس كۇندەرىن جۇما-سەنبىدەن سەنبى-جەكسەنبىگە اۋىستىردى.

جۇما كۇندەرى بيۋجەتتىك ۇيىمدار مەن مەكتەپتەر تەك تۇسكە دەيىن جۇمىس ىستەيدى.

ب ا ءا- دەگى شاردجادا قىزمەتكەرلەر اپتاسىنا ءۇش كۇن - جۇما، سەنبى جانە جەكسەنبى كۇندەرى دەمالادى.

شاردجادا ءتورت كۇندىك جۇمىس اپتاسى ەنگىزىلگەننەن كەيىن ءبىر جىلدان استام ۋاقىت وتكەندە ۇكىمەت جۇرگىزگەن زەرتتەۋ جۇمىسشىلاردىڭ ونىمدىلىگى، پسيحيكالىق دەنساۋلىعى 90 پايىزعا ارتقانىن كورسەتتى.