اقتوبە وبلىسىندا مەديتسينالىق قۇرىلعىنى 4 ەسە ارتىق باعامەن ساتىپ العان - باس پروكۋراتۋرا
بۇل تۋرالى بۇگىن باس پروكۋرور بەرىك اسىلوۆتىڭ توراعالىعىمەن القا وتىرىسىندا ءمالىم بولدى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
جيىندا جەر سالاسىنداعى زاڭدىلىقتى ساقتاۋ، سونداي-اق مەديتسينالىق بۇيىمداردى ساتىپ الۋ ماسەلەلەرى قارپالعان.
ەكىنشى ماسەلە بويىنشا «دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ» قىزمەتى تەكسەرىسىنىڭ ناتيجەلەرى تالقىلاندى.
پروكۋرورلىق تەكسەرىس كەزىندە بيۋدجەت قاراجاتىن جىمقىرۋ جانە جوعارى باعامەن ساپاسىز مەديتسينالىق تەحنيكانى ساتىپ الۋ فاكتىلەرى انىقتالدى.
ماسەلەن، اقتوبە وبلىسىنداعى مەديتسينالىق ورتالىق جىلجىمالى شۇعىل مەديتسينالىق كومەك كەشەنىن (جەدەل جاردەم) كەدەندىك قۇنىنان 4 ەسە ارتىق باعامەن ساتىپ الىنعان. نارىقتىق باعاسى 16,6 ميلليون تەڭگە بولسا، ورتالىققا 72,9 ميلليون تەڭگە جۇمسالعان.
وسىنداي جايتتەر الماتى قالاسىندا، اقمولا، اتىراۋ، قاراعاندى، قوستاناي، ش ق و، ب ق و، جامبىل جانە پاۆلودار وبلىستارىنان دا انىقتالدى.
«تەكسەرىس ناتيجەلەرى بويىنشا پروكۋراتۋرا زاڭ بۇزۋشىلىقتارىن جويۋ تۋرالى 208 ۇسىنۋ ەنگىزدى، 405 ادام تارتىپتىك جانە اكىمشىلىك جاۋاپقا تارتىلدى، 15 سوتقا دەيىنگى تەرگەپ-تەكسەرۋ باستالدى»، - دەلىنگەن حابارلامادا.
وتىرىس بارىسىندا پايدالانىلماي جاتقان 1,5 ميلليون گەكتار جەردىڭ مەملەكەتكە قايتارىلعانى ايتىلدى.