ويىنشىق تاپانشامەن قورقىتقان: ەر ادام ويىن كلۋبىنان 4 ميلليون تەڭگە الىپ كەتكەن - ۆيدەو
«30-قىركۇيەك كۇنى ساعات 12.00 شاماسىندا قاراعاندى قالالىق پوليتسيا باسقارماسىنىڭ جەدەل باسقارۋ ورتالىعىنا قالاداعى ويىن كلۋبتارىنىڭ بىرىنە قاراقشىلىق شابۋىل جاسالعانى تۋرالى حابارلاما ءتۇستى. وقيعا ورنىنا بىردەن جەدەل-تەرگەۋ توبى جىبەرىلدى. پوليتسەيلەرگە كلۋبتىڭ قىزمەتكەرى ۇنەمى وسى مەكەمەدە ويىن ويناپ جۇرگەن كليەنتتىڭ ءبىرى كەنەتتەن تاپانشاعا ۇقساس زاتپەن قورقىتىپ، اقشا تالاپ ەتكەنىن ءتۇسىندىردى. كۇدىكتى كاسساداعى 3,9 ميلليون تەڭگەنى قولدى قىلىپ، وقيعا ورنىنان ءىزىن سۋىتقان. 34 جاستاعى كۇدىكتى ازامات انىقتالدى»، - دەلىنگەن پوليتسيا مالىمەتىندە.
كۇدىكتى سول مەكەمەدەگى ويىن بارىسىندا قوماقتى قارجىسىنان ۇتىلىپ قالىپ، سوڭىندا وسىنداي ارەكەتكە بارعانىن ايتقان.
«ول ويىنشىق تاپانشا ساتىپ العان. كۇدىكتىدەن ايعاق زات تاركىلەندى. اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 192-بابىنا (قاراقشىلىق) سايكەس، قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. تەرگەۋ امالدارى جۇرگىزىلىپ جاتىر»، - دەلىنگەن حابارلامادا.