نۇر-سۇلتاندا بالاباقشاداعى 4 ءبۇلدىرشىن قۇرىلىس الاڭىنا قاشىپ كەتكەن - ۆيدەو

نۇر-سۇلتان. قازاقپارات - ەلوردالىق ءبىلىم باسقارماسى بالاباقشا بوبەكتەرىنىڭ قۇرىلىس الاڭىنا قاشىپ كەتكەنى ءۇشىن تاربيەشى مەن مەڭگەرۋشىنى جاۋاپقا تارتتى، دەپ حابارلايدى قازاقپارات ءتىلشىسى.

«الەۋمەتتىك جەلىدە №73 «اياۋلىم» بوبەكجاي-بالاباقشاسى» م ك ق ك جانىنداعى قۇرىلىس الاڭىندا 4 بالا جۇرگەنى تۋرالى بەينەماتەريال تارادى. اتالعان فاكتى بويىنشا ءبىلىم باسقارماسى №73 «اياۋلىم» بالاباقشاسىنا بارىپ قىزمەتتىك تەكسەرۋ جۇرگىزدى»، - دەپ جاۋاپ بەردى قالالىق ءبىلىم باسقارماسى. تەكسەرۋ بارىسىندا بالاباقشا مەڭگەرۋشىسى ح. د. تايبوكەنوۆامەن اڭگىمە جۇرگىزىلىپ، تۇسىندىرمە جازبا الىنعان. ءتورت بالانىڭ سەرۋەن كەزىندە بالاباقشا اۋماعىنان قاشىپ كەتكەنى انىقتالدى. بالالار قورشاۋداعى كىشكەنە تەسىك ارقىلى شىعىپ كەتكەن. از ۋاقىتتا بالالار كەرى قايتارىلعان.

«قازىرگى ۋاقىتتا بالالار باقشادا، ولاردىڭ جاعدايى ءبىرقالىپتى. بالاباقشانىڭ مەديتسينا قىزمەتكەرى تەكسەرۋ جۇرگىزدى. بۇلدىرشىندەردىڭ دەنەسىنەن ەشقانداي جاراقات تابىلعان جوق. ءوز لاۋازىمدىق مىندەتتەرىنە نەمقۇرايلى قاراۋ فاكتىسى بويىنشا تاربيەشى مەن شارۋاشىلىق ءبولىمىنىڭ مەڭگەرۋشىسى تارتىپتىك جاۋاپكەرشىلىككە تارتىلدى. بالاباقشا مەڭگەرۋشىسىنە قاتىستى ءبىلىم باسقارماسىنىڭ تارتىپتىك كوميسسياسىنىڭ وتىرىسىندا قاراۋ ءۇشىن ماتەريال دايىندالدى»، - دەيدى ءبىلىم باسقارماسى.

اۆتور: ايجان سەرىكجان قىزى