ەلوردا ءدامحانالارىندا ءبىر ۇستەلدە 4 ادامنان ارتىق وتىرۋعا بولمايدى
بۇل تۋرالى نۇر-سۇلتان قالاسىنىڭ باس مەملەكەتتىك سانيتار دارىگەرى سارحات بەيسەنوۆا ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدىڭ باس قالاسىندا COVID-19 ىندەتىنىڭ تەز وسۋىنە بايلانىستى ەپيدەميولوگيالىق جاعداي كۇردەلى. سوڭعى تاۋلىكتە ىشىندە زەرتحانالىق راستالعان 3312 جاعداي تىركەلدى، ءوسىم - %2,07 دى قۇرايدى. سوڭعى اپتادا COVID-19 بويىنشا 9136 جاعداي تىركەلدى. سىرقات تانۋشىلىق كورسەتكىشى 100 مىڭ تۇرعىنعا شاققاندا الدىڭعى اپتادان 7,9 ەسە جوعارى، ياعني سىرقاتتانۋشىلىقتىڭ اپتالىق كورسەتكىشى 97,3 تەن 768,8 گە دەيىن ءوستى، ال رەپرودۋكتيۆتىك كورسەتكىش 3,08 گە جەتىپ وتىر»، - دەدى .
ونىڭ سوزىنشە، قاڭتاردىڭ العاشقى 12 كۇنىندە بارلىعى 40 مىڭنان استام تەست جاسالدى. جانە كوروناۆيرۋس ينفەكسياسى 9428 ادامنان تابىلدى، بۇل 2021-جىلعى جەلتوقسان ايىمەن سالىستىرعاندا 3 ەسە ارتىق.
«بارلىق جاستاعى ادامدار ينفەكسياعا بەيىم بولىپ كەلەدى، ءبىراق سوڭعى كۇندەرى ءبىز 25-39 جاستاعى ادامدار اراسىندا ءبىرشاما ءوسىمدى بايقادىق، ولار ەرەسەك تۇرعىنداردىڭ %30 ىن قۇرايدى، بۇل جالپى سىرقاتتانۋشىلىقتىڭ %79 ىن قۇرايدى. بالالار ۇلەسى %18 دى جانە جاس وسپىرىمدەر %3,0 دى قۇرايدى. وسىعان وراي تاعى ءبىر ماڭىزدى جايت، ادام جينالاتىن ول تاماقتانۋ ورىندارى. قاۋلىعا سايكەس 1 ۇستەلدىڭ باسىندا 4 ادامنان ارتىق وتىرۋعا نەمەسە وتىرعىزۋعا بولمايدى»، - دەيدى ول.