ارشالى اۋدانىندا ەلوردانىڭ ازىق-تۇلىك بەلدەۋىن دامىتۋ بويىنشا 4 جوبا جۇزەگە اسىرىلۋدا
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگىدە اۋدان اكىمى ايدار بايمانوۆ ءمالىم ەتتى، دەپ حابارلايدى قازاقپارات.
اۋدان اكىمىنىڭ ايتۋىنشا، جىل باسىنان بەرى اۋىل شارۋاشىلىعىنىڭ ءوسىمى 1,3 پايىزعا ارتتى، وندىرىلگەن ءونىم كولەمى 4 ميللياردتان استام تەڭگەنى قۇرادى.
«اۋىل شارۋاشىلىعىندا جالپى ءونىمىنىڭ ناقتى كولەم يندەكسى 75,3 پايىزدى قۇرادى. ەگىستىك جۇمىستارىن تولىق كەشەندى جۇرگىزۋدە اۋىل شارۋاشىلىق تەحنيكامەن جابدىقتالۋى ماڭىزدى ورىن الادى. اعىمداعى جىلى اۋداننىڭ اۋىل شارۋاشىلىق قۇرىلىمدارى جالپى سوماسى 1,1 ميلليارد تەڭگەگە 36 بىرلىك اۋىل شارۋاشىلىق تەحنيكاسىن ساتىپ الدى»، - دەدى ايدار بايمانوۆ.
اكىم اتاپ وتكەندەي، اۋداندا سۋارمالى جەرلەردىڭ اۋدانىن كەڭەيتۋ بويىنشا جۇمىستار جۇرگىزىلۋدە.
«بيىلعى جىلى اۋداندا سۋارمالى جەرلەردىڭ كولەمى 28 پايىزعا، ياعني 243 گەكتارعا ۇلعايتىلدى»، - دەپ تولىقتىردى اۋدان اكىمى.
سونىمەن بىرگە، مۇندا ەتتى مال شارۋاشىلىعىن دامىتۋعا ەرەكشە نازار اۋدارىلادى. وتكەن جىلى جالپى سانى 404 باس ەتتى تۇقىم باعىتىنداعى 3 فەرما جانە 2 تاۋارلى ءسۇت فەرما قۇرىلدى. اعىمداعى جىلى مال شارۋاشىلىعىن دامىتۋ بويىنشا ينديكاتيۆتىك كورسەتكىشتەردى ورىنداۋ اياسىندا 40 باس گەرەفورد سيىرلارى جانە 33 باس سيممەتال سيىرلارى ساتىپ الىندى.
«استانانىڭ اينالاسىنداعى ازىق-تۇلىك بەلدەۋىن دامىتۋ شەڭبەرىندە 2021-جىلعا 21,1 ميلليارد تەڭگە سوماسىنا 4 ينۆەستيتسيالىق جوبانى ىسكە اسىرۋ جوسپارلانىپ وتىر.
وسى جوبالار اياسىندا جىلىنا 6 مىڭ توننا قۇس ەتىن وندىرەتىن قۇس فابريكاسىن قولدانىسقا بەرۋدىڭ 2- كەزەگىن جۇزەگە اسىرۋ، 100 باس ءىرى قارا مالعا ارنالعان بورداقىلاۋ الاڭىن اشۋ جوسپارلانعان. سونداي-اق، ءسۇت سالاسىن ودان ءارى جەدەل دامىتۋ ماقساتىندا 150 باسقا ارنالعان ءسۇت فەرماسى سالىنادى. اتالعان جوبالاردى ىسكە اسىرۋ 130 جاڭا جۇمىس ورنىن قۇرۋعا مۇمكىندىك بەرەدى»، - دەپ تۇيىندەدى اۋدان اكىمى.