ەلورداعا قاتىنايتىن 4 جولاقتى جولداردىڭ سانى ارتادى

نۇر- سۇلتان. قازاقپارات - بيىل الماتى- وسكەمەن تاسجولىنىڭ تالدىقورعان- وسكەمەن ۋچاسكەسىندە كۇردەلى جوندەۋ اياقتالادى، دەپ حابارلايدى قازاقپارات ءتىلشىسى.

يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ۇكىمەت وتىرىسىندا وسىنداي مالىمەت ايتتى.

«قازىرگى تاڭدا 15 اۆتوجول جوباسى جۇزەگە اسىرىلىپ جاتىر. جىل قورىتىندىسىندا 768 شاقىرىمدىق تالدىقورعان- وسكەمەن ۋچاسكەسىن رەكونسترۋكتسيالاۋدى تولىق اياقتاۋ جوسپارلانعان. بۇل - ورتا ازيا رەسپۋبليكالارىن رەسەيدىڭ شىعىس- ءسىبىر ايماعىمەن جانە قازاقستاننىڭ وڭتۇستىگىن شىعىسپەن بايلانىستىراتىن حالىقارالىق ترانزيتتىك ءدالىز»، - دەگەن مينيستر اتالمىش ءدالىزدىڭ الاكولدەگى تۋريستىك كلاستەردى دامىتۋدا ماڭىزى ەرەكشە ەكەنىن ەسكە سالدى.

ۆەدومستۆو باسشىسى نۇر- سۇلتان قالاسى مەن وڭىرلەردى جوعارى جىلدامدىقتى 4 جولاقتى اۆتوماگيسترالمەن بايلانىستىرۋ جۇمىسى جالعاساتىنىن ايتادى.

«كوكشەتاۋ، پاۆلودار جانە قاراعاندى باعىتىنداعى جۇمىستار اياقتالدى. بۇگىندە قۇرىلىس جۇمىستارى قاراعاندى قالاسىنان قاپشاعايعا دەيىنگى ۋچاسكەدە جۇرگىزىلۋدە. جىل سوڭىنا دەيىن بالقاشقا دەيىنگى ۋچاسكە (363 شاقىرىم) ، كەلەسى جىلى قاپشاعايعا دەيىنگى ۋچاسكە پايدالانۋعا بەرىلىپ، ورتالىق- وڭتۇستىك ءدالىزىنىڭ رەكونسترۋكتسياسىن تولىق اياقتالادى»، - دەدى بەيبىت اتامقۇلوۆ.

ەسكە سالساق، يندۋستريا جانە ينفراقۇرىلىمدىق دامۋ ءمينيسترى اتالمىش شارادا الداعى 5 جىلدا قانشا جول سالىناتىنى تۋرالى مالىمەت بەرگەن بولاتىن.