07:41, 04 - ناۋرىز 2021 | GMT +6
پرەزيدەنت 4 وقۋشى قىزدى قاققان ماس جۇرگىزۋشىنىڭ تەرگەۋىن ءوز باقىلاۋىنا الدى
نۇر-سۇلتان. قازاقپارات - پرەزيدەنت قاسىم-جومارت توقايەۆ الماتى وبلىسىندا 4 وقۋشى قىزدى قاققان ماس جۇرگىزۋشىگە قاتىستى تەرگەۋدى ءوز باقىلاۋىنا الدى، دەپ حابارلايدى قازاقپارات.
بۇل جايىندا پرەزيدەنتتىڭ باسپا ءسوز حاتشىسى بەرىك ءۋالي Facebook پاراقشاسىندا ءمالىم ەتتى.
«پرەزيدەنت الماتى وبلىسىندا ماس جۇرگىزۋشىنىڭ ءتورت وقۋشى قىزدى قاعىپ كەتكەن جول-كولىك وقيعاسىنا قاتىستى تەرگەۋ جۇمىستارىن ءوز باقىلاۋىنا الدى. ەكى قىز اۋىر حالدە اۋرۋحانادا جاتىر. مەملەكەت باسشىسى كولىك جۇرگىزۋشىسىن زاڭعا سايكەس جاۋاپقا تارتۋ ءۇشىن اتالعان وقيعانى جان-جاقتى تەكسەرۋ جونىندە تاپسىرما بەردى. زارداپ شەككەن قىزدار مەن ولاردىڭ اتا-انالارىنا ءتيىستى كومەك كورسەتىلەدى» دەپ جازدى بەرىك ءۋالي.
ەسكە سالا كەتەيىك، بۇگىن الماتى وبلىسىندا ماس جۇرگىزۋشى 4 وقۋشىنى قاعىپ كەتتى. ءارتۇرلى دەنە جاراقاتىن العان ءۇش بالا اۋرۋحاناعا جاتقىزىلدى. كولىك قاققان ەكى وقۋشىنىڭ جاعدايى وتە اۋىر.