قازاق-قىرعىز شەكاراسىنان وتكەن 4 جولاۋشىدان كوروناۆيرۋس تابىلدى

جامبىل وبلىسى. قازاقپارات - شەتەلدەن كەلەتىن جولاۋشىلار كوروناۆيرۋس ينفەكتسياسىن جۇقتىرىپ اكەلىپ، حالىققا تاراتپاس ءۇشىن مەملەكەتتىك شەكارادا وتكىزۋ بەكەتتەرى جۇمىس ىستەيدى، دەپ حابارلايدى قازاقپارات.

ماسەلەن، جامبىل وبلىسىندا قىرعىزستانمەن شەكارادا 4 پۋنكت بار، ولار - اۋقاتتى، قاراسۋ، سىپاتاي باتىر جانە ايشا ءبيبى.

10-16- جەلتوقسان ارالىعىندا مەملەكەتتىك شەكارانى 1118 جاياۋ جۇرگىنشى مەن 4188 اۆتوموبيل كەسىپ ءوتتى.

ونىڭ ىشىندە 725 ق ر ازاماتى كوروناۆيرۋسقا پ ت ر تەست تاپسىردى. اراسىنداعى 4 ادامنىڭ اۋرۋ جۇقتىرعانى انىقتالدى. ناۋقاستار امبۋلاتوريالىق ەمدەلۋگە وقشاۋلاندى جانە ەپيدەمياعا قارسى ءىس-شارالار جۇرگىزىلدى.

100 ادام كارانتينگە جىبەرىلدى. پ ت ر تەستىلەۋدىڭ تەرىس ناتيجەسى بار انىقتامانىڭ بولماۋىنا بايلانىستى 103 ادام ق ر اۋماعىنا كىرگىزىلمەدى.

ءار وتكىزۋ پۋنكتىندە سانيتارلىق قىزمەتتىڭ ەكى مامانى تاۋلىكتىك كەزەكشىلىك ەتەدى.

ولار تەرمومەتريا جاساپ، قازاقستان جانە شەتەل ازاماتتارىنا ساۋالناما جۇرگىزەدى.

بۇل رەتتە انىقتاما تەك اككرەديتتەلگەن زەرتحانالاردان عانا قابىلدانادى.

انىقتامانىڭ ءتۇپ نۇسقاسى QR- كودتى سكانەرلەۋ ارقىلى تەكسەرىلەدى. بارلىق ماماندار جەكە قورعانىس قۇرالدارىمەن قامتاماسىز ەتىلگەن.