شىعىس قازاقستاندا كەزەكشى سىنىپتا وقيتىن 4 بالا كوروناۆيرۋس جۇقتىردى
ش ق و تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسپا ءسوز قىزمەتىنىڭ مالىمەتىنشە، قىركۇيەك ايىنان باستاپ ءوڭىر مەكتەپتەرىندەگى كەزەكشى سىنىپتارداعى وقۋشىلار اراسىندا كوروناۆيرۋس جۇقتىرۋدىڭ 4 جاعدايى تىركەلدى. ولار - شەمونايحا اۋدانىنىڭ 4-سىنىپ وقۋشىلارى، كوكپەكتى اۋدانىنىڭ 11-سىنىپ وقۋشىسى جانە التاي اۋدانىنىڭ 2-سىنىپ وقۋشىسى.
«كوروناۆيرۋس ينفەكتسياسىنا شالدىققان بالالار شاعىن جيناقتالعان مەكتەپتەردە وقيدى. قازىردە شەمونايحا، التاي اۋداندارىنداعى 2 مەكتەپتىڭ كەزەكشى سىنىپتارى جانە كوكپەكتى اۋدانىنداعى ءبىر مەكتەپ 14 كۇنگە كارانتينگە جابىلعان. ءبىلىم وردالارىنداعى كوروناۆيرۋس ينفەكتسياسىنىڭ وشاعى بولعان سىنىپتاردى قاشىقتان وقىتۋعا اۋىستىرۋ تۋرالى قاۋلى شىقتى. قاۋىپتى دەرت انىقتالعان بارلىق مەكتەپتەردە ەپيدەمياعا قارسى دەزينفەكتسيالاۋ شارالارى جۇرگىزىلدى» دەلىنگەن حابارلامادا. ەستەرىڭىزگە سالا كەتەيىك، كەشە ش ق و مەكتەبىندە وقۋشىدان كوروناۆيرۋس تابىلعانى حابارلانعان بولاتىن.