جۇيەلى جەمقورلىق كورسەتكىشى ەڭ جوعارى 4 ءوڭىر اتالدى

نۇر- سۇلتان. قازاقپارات - جۇيەلى سىبايلاس جەمقورلىقتىڭ باسىم بولىگى الماتى وبلىسىندا، الماتى قالاسىندا، شىعىس قازاقستان جانە قوستاناي وبلىسىندا انىقتالعان.

بۇل تۋرالى Antikor News جوباسىنىڭ تىكەلەي ەفيرىندە ايتىلدى، دەپ حابارلايدى قازاقپارات ءتىلشىسى.

«ستاتيستيكا كورسەتكەندەي، جۇيەلى سىبايلاس جەمقورلىقتىڭ باسىم بولىگى: الماتى وبلىسىندا - 12 فاكتى (66 قىلمىس)، الماتى قالاسىندا - 9 (36 قىلمىس)، شىعىس قازاقستان (51 قىلمىس) جانە قوستاناي (37 قىلمىس) وبلىستارىندا 7 فاكتى بويىنشا انىقتالدى»، - دەيدى اگەنتتىكتىڭ اپپارات باسشىسى قۋانىش جاپاقوۆ.

ول وتكەن اپتادا ءتۇرلى سالالاردا انىقتالعان سىبايلاس جەمقورلىقتىڭ جۇيەلى فاكتىلەرىنە توقتالىپ ءوتتى.

«شىمكەنت قالاسى بويىنشا سىبايلاس جەمقورلىققا قارسى قىزمەت ەسىرتكى بيزنەسىنە قارسى كۇرەس بولىمشەسىنىڭ، تۇركىستان وبلىسى بويىنشا پوليتسيا دەپارتامەنتىنىڭ ارىس اۋداندىق پوليتسيا ءبولىمىنىڭ باستىعىنا قاتىستى بىرنەشە رەت الاياقتىق جاسادى دەگەن كۇدىكپەن سوتقا دەيىنگى تەرگەۋدى باستادى. پوليتسيا مايورى 2019 -جىلدىڭ تامىز ايىندا پوليتسيا قىزمەتكەرى بولا تۇرا، شىمكەنت قالاسىنىڭ ازاماتتارىن الداۋ جانە سەنىمىنە قيانات جاساۋ ارقىلى جالپى سوماسى 94 ميلليون تەڭگە تۇراتىن قىمبات «Lexus LX 570» جانە «Toyota Camry» ماركالى 4 اۆتوكولىگىن يەمدەنىپ جانە وسىعان ۇقساس جولمەن شارتتى تۇردە مەرزىمىنەن بۇرىن بوساتۋعا ىقپال ەتۋ سىلتاۋىمەن سوتتالعاننىڭ 33 مىڭ ا ق ش دوللارىن قۇرايتىن اقشالاي قاراجاتىن يەمدەنىپ العان دەگەن كۇدىككە ءىلىندى. بيىل 29 - تامىزدا كۇدىكتىگە قاتىستى «كۇزەتپەن ۇستاۋ» تۇرىندەگى بۇلتارتپاۋ شاراسى سانكسيالاندى»، - دەيدى ول.

اۆتور: زارينا قاھارمان