نۇر- سۇلتاندا جاڭادان 4 سپورت كەشەنى سالىنادى
بۇل تۋرالى بريفينگ بارىسىندا ەلوردالىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ناريمان ەلامانوۆ ءمالىم ەتتى، دەپ حابارلايدى قازاقپارات.
«100 دەنە شىنىقتىرۋ- ساۋىقتىرۋ كەشەنىن» سالۋ جوباسى اياسىندا اتالمىش نىساندار يلينكا، كوكتال-2، ءوندىرىس، جەلەزنودوروجنىي تۇرعىن ءۇي الاپتارىندا بوي كوتەرەدى. «قازىرگى ۋاقىتتا ءۇش دەنە شىنىقتىرۋ جانە ساۋىقتىرۋ كەشەنىنىڭ قۇرىلىسى ءجۇرىپ جاتىر. قوسىمشا، «جۇمىسپەن قامتۋدىڭ جول كارتاسى» اياسىندا «تولقىن» سپورت كەشەنىنىڭ شاتىرى كۇردەلى جوندەۋدەن ءوتتى. ءقازىر تەك قابىرعالارىن تەگىستەۋ، اقتاۋ، سىرلاۋ سياقتى جۇمىستارى قالدى» ، - دەپ اتاپ ءوتتى ناريمان ەلامانوۆ.
سونداي- اق، نۇر- سۇلتان قالاسىنداعى «قازاقستان» سپورت سارايىن زاماناۋي تەحنولوگيالاردى قولدانا وتىرىپ جوندەۋ جوباسى پىسىقتالۋدا. وعان قوسا، «استانا ارەنا» ستاديونىنىڭ فۋتبول الاڭىن جاڭارتۋ جانە كيىم اۋىستىرۋ بولمەلەرىن، كىرەبەرىسىن جوندەۋ جۇرگىزىلۋدە.
«سونىمەن قاتار قالادا IAAF (حالىقارالىق جەڭىل اتلەتيكا فەدەراتسيالارىنىڭ قاۋىمداستىعى) تالاپتارىنا تولىق سايكەس كەلەتىن جابىق عيماراتتاردا حالىقارالىق جانە رەسپۋبليكالىق جارىستاردى وتكىزۋگە ارنالعان جەڭىل اتلەتيكالىق سپورت كەشەنىنىڭ قۇرىلىسى اياقتالۋدا. نىسان الەم چەمپيوناتتارى مەن جازعى وليمپيادا ويىندارىن قوسا العاندا، سپورتشىلاردى حالىقارالىق جارىستارعا دايارلاۋ ءۇشىن قازىرگى زامانعى جوعارى تەحنولوگيالىق بازا بولادى. «قازانات» يپپودرومىنىڭ اۋماعىندا يپپوتەراپيا ادىسىمەن مۇمكىندىگى شەكتەۋلى بالالاردى وڭالتۋ ءۇشىن ات سپورتى كەشەنىن سالۋ جانە پايدالانۋعا بەرۋ بويىنشا جۇمىستار جۇرگىزىلۋدە. نىسان 250 ادامعا ارنالعان، 600 ورىندىق تريبۋنالارى بار. بۇل جوبا مەملەكەتتىك- جەكەشەلىك ارىپتەستىك شەڭبەرىندە جەكە قارجىلىق باستاما بويىنشا ىسكە اسىرىلىپ جاتىر» ، - دەدى ن. ەلامانوۆ.
بۇدان بولەك، قالالىق دەنە شىنىقتىرۋ جانە سپورت باسقارماسى باسشىسى ورىنباسارىنىڭ مالىمەتىنشە، ەلوردادا ۆەلوجولدار سالۋ جۇمىسى قارقىن العان. جوسپارلانعان 123 ك م جولدىڭ 70 ك م بۇگىندە سالىنىپ بىتكەن. 2020 -جىلى - 46,4 ك م، 2021 -جىلى - 36 ك م، ال 2022 -جىلى - 40,7 ك م ۆەلوجول سالۋ جوسپارلانۋدا. وسى ورايدا ەسكە سالا كەتەيىك، بيىل نۇر- سۇلتاندا 12 مەكتەپ سالىنادى. بۇل تۋرالى بۇگىن ءبىرقاتار وقۋ ورىندارىنىڭ قۇرىلىسىمەن تانىسقان ەلوردا اكىمى التاي كولگىنوۆ مالىمدەگەن ەدى.