قازاقپارات كۇنتىزبەسى: 4- تامىز
ەستە قالار وقيعالار
1974-جىلى ءابدىجامىل نۇرپەيىسوۆتىڭ 1918-1920-جىلدارداعى ءبىرىنشى دۇنيەجۇزىلىك سوعىس پەن ازاماتتىق سوعىس كەزىندە قازاقستاندا بولعان وقيعالار تۋرالى جازعان «قان مەن تەر» تريلوگياسى س س س ر مەملەكەتتىك سىيلىعىن يەلەندى.
2003-جىلى استاناداعى رەسپۋبليكالىق كلينيكالىق اۋرۋحانادا الەمدە تۇڭعىش رەت جۇلىننىڭ جۇيكە كلەتكالارىن ترانسپلانتاتسيالاۋ بويىنشا وپەراتسيا وتكىزىلدى. پاتسيەنت ەكى جىل بويى اياعىن سەزبەگەن بولاتىن.
وپەراتسيادان كەيىن ەكىنشى كۇنى ونىڭ اياقتارىنا جان كىردى. وپەراتسيانى سول كەزدەگى قازاقستان رەسپۋبليكاسىنىڭ دەنساۋلىق ساقتاۋ ءمينيسترى، پروفەسسور جاقسىلىق دوسقاليەۆ وتكىزدى.
2004-جىلى قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات باسقارماسى قۇرامىنداعى قازاقستان حالقى اسسامبلەياسىنىڭ حاتشىلىعى قۇرىلدى.
2011-جىلى «جۇلدىز» بالالار قوعامدىق ۇيىمدارىنىڭ رەسپۋبليكالىق وداعى ق ر تۇڭعىش پرەزيدەنتىنىڭ مۋزەيىنە التىن قىلىشتى سىيعا تارتتى. ول ۇجىمدىق قاۋىپسىزدىك شارتى ۇيىمىنا مۇشە ەلدەردىڭ 2008-جىلى قىرعىزستاندا وتكەن جاس پاتريوتتار حالىقارالىق جيىنىنىڭ جوعارى رەسمي ناگراداسى رەتىندە تابىستالعان بولاتىن.
2013-جىلى تەگەراندا ق ر پرەزيدەنتى نۇرسۇلتان نازاربايەۆ جاڭادان سايلانعان يران يسلام رەسپۋبليكاسىنىڭ پرەزيدەنتى حاسان رۋحانيدىڭ يناۋگۋراتسياسى راسىمىنە قاتىستى.
2016 -جىلى الماتىدا پەرزەنتحانالار مەن پەريناتالدىق ورتالىقتارعا ارنالعان جاڭا مەديتسينالىق سەرۆيس ىسكە قوسىلدى. ول نارەستە تۋعان كەزدە بالا تۋرالى ەلەكتروندى دەرەكتەردى ەنگىزىپ، ارناۋلى بىلەزىككە جاپسىرىلىپ، نارەستەنىڭ قولىنا بايلاپ قويۋعا ارنالعان.
وسى سەرۆيستىڭ ارقاسىندا بىلەزىكتەردىڭ جەلىمىنىڭ اجىراۋى، بالالاردىڭ اۋىسىپ كەتۋى توقتادى. ويتكەنى بىلەزىكتەگى ارناۋلى ىلمەك ونىڭ جوعالۋىنا، دەرەكتەردىڭ الماسىپ كەتۋىنە جول بەرمەيدى.
2016-جىلى XXXI جازعى وليمپيادا ويىندارىنىڭ استاناسى برازيليانىڭ ريو-دە-جانەيرو قالاسىندا قازاقستاننىڭ تۋى كوتەرىلدى. ريودا 104 سپورتشى قازاقستاننىڭ نامىسىن قورعادى. وليمپيادادا مەدالداردىڭ رەكوردتىق جيىنتىعى (306) ويناتىلدى. ويىندارعا 207 ەل قاتىستى، ونىڭ ىشىندە كوسوۆو مەن وڭتۇستىك سۋدان العاش رەت جارىس جولىنا شىقتى.
2017-جىلى قازاقستاندا العاش رەت ەس-145 تىكۇشاعىنىڭ (FNPT III) ۇشۋ-ناۆيگاتسيالىق ترەناجەرىندە ق ر اسكەري اۋە كۇشتەرىنىڭ ۇشقىشتارى جاتتىعا باستادى. ترەناجەر ەكيپاجدىڭ كاسىبي دايىندىعىنىڭ ساپا دەڭگەيىن ارتتىرىپ، ۇشۋ قاۋىپسىزدىگىن قامتاماسىز ەتەدى.
2017-جىلى استانادا ەرەكشە قاجەتتىلىگى بار ادامداردىڭ قاتىسۋىمەن «Blind Race Astana - Paris» ۆەلومارافونى باستالدى. ۆەلوشاباندوزدار التى ەلدىڭ: قازاقستان، رەسەي، بەلارۋس، پولشا، گەرمانيا، فرانسيا ەلدەرىنىڭ شەكاراسىنان اسىپ، 30 قالادان ءوتتى. ناشار كورەتىن جانە زاعيپ ۆەلوسيپەدشىلەر مارافون بارىسىندا 5000 شاقىرىمدى ەڭسەردى. 2018-جىلى ارمەنيادا وتكەن «دوستاستىق جاۋىنگەرلەرى» اسكەري-كاسىبي حالىقارالىق سايىسىندا قازاقستان رەسپۋبليكاسى قارۋلى كۇشتەرىنىڭ كومانداسى ءبىرىنشى ورىندى يەلەندى. بايقاۋعا ارمەنيا، بەلارۋس، گرەكيا، يران، قازاقستان جانە رەسەي كوماندالارى قاتىستى.