قازاقستاندىق وليمپيادا جۇلدەگەرى دوپينگ قولدانعانى ءۇشىن 4 جىلعا جارىستان شەتتەتىلدى

نۇر-سۇلتان. قازاقپارات - ءبىرقاتار سپورتشىلار دوپينگ قولدانعانى ءۇشىن سپورت جارىستارىنان شەتتەتىلدى، دەپ حابارلايدى قازاقپارات قازاقستاننىڭ ۇلتتىق انتيدوپينگ ورتالىعى بىرنەشە جىل جارىسقا قاتىسا المايتىن سپورتشىلاردىڭ جاڭا ءتىزىمىن ۇسىندى.

وعان سايكەس 2020 -جىلدىڭ باسىنان بەرى 11 اتلەت دوپينگ قولدانعانى ءۇشىن جازاعا تارتىلعان. ونىڭ ىشىندە 2012 -جىلعى وليمپيادانىڭ قولا جۇلدەگەرى، اۋىر اتلەت اننا نۇرمۇحامبەتوۆا دا بار.

ونىڭ سىناماسىنان ورالتۋرينابول انابوليك ستەرويدى تابىلعان. ول 2019 -جىلدان باستاپ 2023 -جىلعا دەيىن، ياعني 4 جىلعا جارىستان شەتتەتىلدى. سونىمەن قاتار شاڭعىشى الەكسەي پولتورانيننىڭ ءىسى بويىنشا شەشىم قابىلداندى.

ول دا 2019-2023 -جىلدار ارالىعىندا ەشبىر جارىسقا قاتىسا المايدى. دوپينگ قولدانعان تانىمال سپورتشىلار اراسىندا جەڭىل اتلەت ليۋبوۆ ۋشاكوۆا، ترەكتەگى ۆەلوسپورت شەبەرى رومان ۆاسيلەنكوۆ، ۆولەيبولشى انتون كۋزنەسوۆ، حوككەيشى ۆلاديسلاۆ نيكيفوروۆ بار.

ولار دا 2-4 جىل ارالىعىندا ديسكۆاليفيكاتسيا الدى. سونىمەن قاتار تەننيسشى بەيبىت جۇقايەۆ، جەڭىل اتلەتتەر الەكساندر بەزرۋكوۆ، ولەسيا زادوروجنايا، گيمناسشى گاۋحار تولەبايەۆا جانە سامبوشى فارۋح ميرحاكيموۆتىڭ سىناماسىنان دا دوپينگ تابىلعان.

فوتو: olympic.kz