توتەنشە جاعدايدا پايداعا كەنەلمەك بولعان كاسىپكەرلەردەن 4 ميلليون ماسكا تاركىلەندى

نۇر- سۇلتان. قازاقپارات - اقپارات جانە قوعامدىق دامۋ ءمينيسترى داۋرەن ابايەۆ توتەنشە جاعداي كەزىندە ەلدەگى زاڭدىلىق پەن ءتارتىپ ساقتاۋدى قامتاماسىز ەتۋ جۇمىستارى قالاي جۇرگىزىلىپ جاتقانى جونىندە باياندادى، دەپ حابارلايدى قازاقپارات.

«قازىر بارلىق وڭىرلەردە پروكۋراتۋرا، پوليتسيا جانە مەملەكەتتىك كىرىستەر كوميتەتىنىڭ وكىلدەرىنەن قۇرالعان ءموبيلدى توپتار جۇمىس ىستەۋدە. ولار بارلىق جەردە مەديتسينالىق ماسكالار مەن انتيسەپتيكتەردى رۇقساتسىز، جوعارى باعادا ساتۋ بويىنشا دەرەكتەردى انىقتاۋمەن اينالىسىپ جاتىر. توتەنشە جاعداي جاريالانعالى بەرى قىلمىستىق كودەكستىڭ 215-بابى بويىنشا 15 تەرگەۋ امالى باستالدى» ، - دەدى مينيستر حابار 24 - ارناسىنداعى ونلاين رەجىمدەگى باسپا ءسوز ءماسليحاتىندا.

داۋرەن ابايەۆ مۇنداي جاعدايلار ەلوردادا، الماتىدا جانە اقتوبە، الماتى، قاراعاندى، قوستاناي، ب ق و- دا انىقتالعان. «ەلوردادا جانە اقتوبە وبلىسىندا ماسكا مەن انتيسەپتيكتى زاڭسىز ساتقان 40 ادام اكىمشىلىك جاۋاپقا تارتىلدى. وسى اكىمشىلىك جانە قىلمىستىق ىستەر بويىنشا 4 ميلليون ماسكا مەن 13 مىڭ ليتر انتيسەپتيك تاركىلەندى. ولار دەنساۋلىق ساقتاۋ مەكەمەلەرىنە بەرىلىپ جاتىر» ، - دەدى ول.