قازاقستاننىڭ 4 وڭىرىندە قىتايدان كەلگەن ازاماتتار اۋرۋحاناعا جاتقىزىلدى

نۇر- سۇلتان. قازاقپارات - اقمولا وبلىسىندا قىتايدان كەلگەن ءبىر وتباسى اۋرۋحاناعا جاتقىزىلدى. بۇل تۋرالى قازاقستاننىڭ باس سانيتارلىق دارىگەرى جانداربەك بەكشين ايتتى، دەپ حابارلايدى قازاقپارات ءتىلشىسى.

«بۇگىن ساعات 11 دەگى اقپاراتىمىزعا سايكەس، ەلىمىزدە 4 ناۋقاس ستاتسيونارعا ورنالاستىرىلدى. قازىرگى تاڭدا الماتى قالاسىنداعى ەكى ناۋقاس مەديتسينالىق كومەك العاننان كەيىن ستايتسوناردان شىعارىلدى. سونىمەن قاتار اتىراۋ وبلىسىنىڭ قىزىلقوعا اۋدانىندا 1 ناۋقاس بار. ول جرۆي دياگنوزىمەن ەم الىپ جاتىر. نۇر- سۇلتان قالاسىندا تاڭەرتەڭ قىتايدىڭ بەيجىڭ قالاسىنان كەلگەن 16 جاستاعى وقۋشى ەلورداداعى بالالار ينفەكتسياسى اۋرۋحاناسىنىڭ ستاتسيونارىنا جاتقىزىلدى. وعان ينفەكتسيونيست كونسۋلتانتتاردىڭ قورىتىندىسى بويىنشا جرۆي دياگنوزى قويىلدى. بالا قازىر ەم الىپ جاتىر» ، - دەدى باس سانيتارلىق دارىگەر.

ونىڭ دەرەگىنشە، بۇگىن تۇستەن كەيىن الماتى قالاسىندا 1 ادام دەنە قىزۋىمەن اۋرۋحاناعا جاتقىزىلعان. ال اقمولا وبلىسىندا حايناندا دەمالىستا بولعان ءبىر وتباسى مۇشەلەرى تولىقتاي ستاتسيوناردا ەم الىپ جاتىر. اتالعان وتباسىنىڭ 3 بالاسىنىڭ ەكەۋىندە دەنە قىزۋى كوتەرىلگەن.

«سەبەبى ءۇشىنشى بالادا دا اۋرۋ بەلگىلەرى بولدى. اكە- شەشەسىندە ونداي بەلگىلەر جوق. ءبىراق، تىعىز قارىم- قاتىناستا بولعاننان كەيىن وندا دا اۋرۋ بەلگىلەرىنىڭ انىقتالۋى ىقتيمال» ، - دەدى ول.

باس سانيتارلىق دارىگەردىڭ ايتۋىنشا، اۋرۋحانالاردا مەديتسينالىق ماسكالار جەتكىلىكتى.

«سونىمەن قاتار ءبىز ءارتۇرلى مەديتسينالىق ماسكالاردى، بىررەتتىك جانە كاسىبي كوستيۋمدەردى، ۆيرۋسقا قارسى پرەپاراتتاردى، دياگنوستيكالىق جابدىقتار مەن ماتەريالداردى شۇعىل تۇردە ساتىپ الامىز. سونىمەن قاتار وتاندىق وندىرۋشىلەرگە داكە تاڭعىشتاردى جاپپاي وندىرۋگە تاپسىرىس بەرىلدى» ، - دەدى ول.