ەلىمىزدە 4 مىڭنان اسا «ساتۋشىسىز دۇكەن» بار
«وتكەن كەزەڭدە جوبالىق كەڭسەلەرگە جۇگىنگەن 3 مىڭنان استام ازامات ءوزىنىڭ بۇزىلعان قۇقىقتارىن تولىعىمەن قالپىنا كەلتىرىپ، ماسەلەلەرىن وڭ شەشتى. مەملەكەتتىك ورگانداردىڭ اشىقتىعى مەن قول جەتىمدىلىگىن ارتتىرۋ ءۇشىن ىڭعايلى فرونت- كەڭسەلەرى بار سەرۆيستىك اكىمدىكتەر اشىلۋدا (اۋداندىق اكىمدىكتەر مەن اۋىلدىق وكرۋگتەر دەڭگەيىنە دەيىن) ، 686 مەملەكەتتىك ورگان كابينەتتىك جۇيەدەن «Open Space» فورماتىنا اۋىستىرىلدى، 3774 مەملەكەتتىك مەكەمە ءبىرىنشى باسشىلارىنىڭ مەملەكەتتىك ورگان عيماراتتارىنىڭ ءبىرىنشى قاباتىنا كوشۋى جۇزەگە اسىرىلدى. قوعامداعى سەنىم اتموسفەراسى - سىبايلاس جەمقورلىقتى تۇبەگەيلى جويۋدىڭ ءبىر تەتىگى بولىپ تابىلادى. ول ءۇشىن العاشقى قادامدار دا جاسالعان، مىسالى ەلىمىز بويىنشا 4344 «ساتۋشىسىز دۇكەن» بار. بۇل ءوز كەزەگىندە ساتىپ الۋشىعا دەگەن سەنىمدى بىلدىرەدى» ، - دەلىنگەن سىبايلاس جەمقورلىققا قارسى ءىس- قيمىل اگەنتتىگىنىڭ حابارلاماسىندا.
سونىمەن قاتار، بيۋدجەت قاراجاتىن ءتيىمدى ءبولۋ جانە ۇنەمدەۋ ماقساتىندا اكىمشىلىك شىعىنداردى ازايتۋ جولىمەن مەملەكەتتىك ورگانداردى، مەديتسينالىق، ءبىلىم بەرۋ مەكەمەلەرىن ترانسفورماتسيالاۋ ءوز جالعاسىن تابۋدا.
شتات سانىن وڭتايلاندىرۋ جانە قايتالاناتىن فۋنكسيالاردى الىپ تاستاۋ جولىمەن مەملەكەتتىك مەكەمەلەردى ترانسفورماتسيالاۋدىڭ تابىستى تاجىريبەسى بار.
بۇگىنگى تاڭدا «ادالدىق الاڭى» جوباسى ەلىمىزدىڭ بارلىق وڭىرلەرىندە جانە ورتالىق مەملەكەتتىك ورگاندار دەڭگەيىندە جۇزەگە اسىرىلۋدا. جاقىن ارادا بارلىق مينيسترلىكتەر مەن ۆەدومستۆولاردا «ادالدىق الاڭى» جوبالىق كەڭسەلەرىنىڭ اشىلۋى كۇتىلۋدە.
«ادالدىق الاڭى» جوباسى مەملەكەت پەن قوعام اراسىنداعى «كوپىر» دەگەندى بىلدىرەدى، ونىڭ ارقاسىندا قوعام وكىلدەرى سىبايلاس جەمقورلىققا قارسى جۇرگىزىلىپ جاتقان ساياسات جونىندە ءوز كوزقاراسىن عانا ەمەس، ونى ىسكە اسىرۋعا تىكەلەي قاتىسا الادى» ، - دەدى سىبايلاس جەمقورلىققا قارسى ءىس- قيمىل اگەنتتىگىنىڭ باسشىسى اليك شپەكبايەۆ.
ايتا كەتەيىك، جوبانىڭ باستى يدەياسى - تۇرمىستىق جەمقورلىقتى جويۋ، سىبايلاس جەمقورلىققا قارسى مادەنيەتتى قالىپتاستىرۋ، پاراساتتىلىق يدەولوگياسىن اۋقىمدى دەڭگەيدە كەڭەيتۋ جانە قوعامدىق باقىلاۋدى كۇشەيتۋ.
