جامبىل وبلىسىندا 4 اۋىل جويىلىپ، تاعى تورتەۋى بىرىكتىرىلەدى
بۇل تۋرالى بۇگىن وڭىرلىك كوممۋنيكاتسيا قىزمەتىندە جامبىل وبلىسى اكىمدىگىنىڭ ساۋلەت جانە قۇرىلىس باسقارماسى باسشىسىنىڭ مىندەتىن اتقارۋشى داۋلەت دوسانوۆ ايتىپ بەردى.
«حالقىنىڭ سانى 50 گە جۋىق 8 ەلدى مەكەن بويىنشا وڭتايلاندىرۋ جۇمىستارى جۇرگىزىلۋدە. ياعني، مويىنقۇم اۋدانىندا 4 ەلدى مەكەن حالىقتىڭ تۇرماۋىنا بايلانىستى تاراتىلادى. ال ت. رىسقۇلوۆ، سارىسۋ، شۋ اۋداندارىنداعى 4 ەلدى مەكەن جاقىن ورنالاسقان اۋىلدارعا قوسىلاتىن بولادى»، - دەيدى د. دوسانوۆ.
بۇگىندە مويىنقۇم اۋدانىنداعى ءتورت ەلدى مەكەندى ەسەپتەن شىعارۋ تۋرالى اۋدان اكىمدىگىنىڭ قاۋلىسى مەن ءماسليحاتتىڭ بىرلەسكەن شەشىمى شىعىپ، وبلىس اكىمدىگى مەن وبلىستىق ءماسليحاتتىڭ بىرلەسكەن شەشىمدەرى قابىلدانىپ ۇلگەرىلگەن. قازىر ستاتيستيكا دەپارتامەنتىنىڭ كاتو جۇيەسى تىزىمىنەن الۋ جۇمىستارى جۇرگىزىلۋدە.
سونداي-اق، سارىسۋ اۋدانىنداعى تالاس اۋىلىن ءوندىرىس اۋىلىنىڭ قۇرامىنا قوسۋ، جارقۇدىق اۋىلىن جاڭاتالاپ اۋىلىنىڭ قۇرامىنا ەنگىزۋ تۋرالى جانە ت. رىسقۇلوۆ اۋدانىنداعى رازەزد-98 اۋىلىن اقبۇلاق اۋىلدىق وكرۋگى ر. سابدەنوۆ اۋىلىنىڭ قۇرامىنا قوسۋ، شۋ اۋدانىنداعى بولتىرىك اۋىلىن اقتاستى ەلدى مەكەنىنە بىرىكتىرۋ تۋرالى وبلىس اكىمدىگىنىڭ قاۋلى جوباسى ازىرلەنىپ، «اشىق ۇكىمەت پورتالىنا» قوعامدىق تالقىلاۋعا ورنالاستىرىلعان.