ەۋرازيا ەلدەرى پارلامەنتتەرى ءتوراعالارىنىڭ 4- كەڭەسى جۇمىسىن باستادى
جيىنعا ق ر تۇڭعىش پرەزيدەنتى - ەلباسى نۇرسۇلتان نازاربايەۆ قاتىسىپ وتىر، دەپ حابارلايدى قازاقپارات ءتىلشىسى.
«ەڭ الدىمەن قازاقستانىمىزدىڭ ءتورى، قازاق ەلىنىڭ ەلورداسى - نۇر- سۇلتان قالاسىنا قوش كەلدىڭىزدەر! سونىمەن بىرگە بۇكىل ەۋرازيا ەلدەرىنىڭ پارلامەنتتەرى ءۇشىن ماڭىزى زور جانە ءرولى دە ەرەكشە جيىنعا قاتىسىپ وتىرعاندارىڭىزعا شىن جۇرەكتەن العىس بىلدىرۋگە رۇقسات ەتىڭىزدەر. بۇگىنگى فورۋم زاڭ شىعارۋشى ورگاندار اراسىندا جان- جاقتى ديالوگ ورناتۋعا، ءوزارا سەنىمدى نىعايتۋعا، پارلامەنتارالىق ىنتىماقتاستىقتى ودان ارى كۇشەيتۋگە كەڭ جول اشادى دەپ سەنىم بىلدىرەمىز»، - دەدى جيىندى اشقان ق ر پارلامەنتى ءماجىلىسىنىڭ سپيكەرى نۇرلان نىعماتۋلين.
فورۋم جۇمىسىنا ەۋروپا مەن ازيانىڭ 65 ەلىنىڭ پارلامەنتتەرى دەلەگاتسيالارى، 14 حالىقارالىق پارلامەنتتىك ۇيىم وكىلدەرى قاتىسادى. ولاردىڭ قاتارىندا ە ق ى ۇ مەن ۇ ق ش ۇ پارلامەنتتىك اسسامبلەيالارى، پارلامەنتارالىق وداق، ازيا پارلامەنتتىك اسسامبلەياسى، حالىقتىڭ قونىستانۋى جانە دامۋى جونىندەگى پارلامەنتارييلەردىڭ ازيالىق فورۋمى، ەۋروپالىق پارلامەنت، ازياداعى ءوزارا ءىس- قيمىل جانە سەنىم شارالارى كەڭەسى، يسلام ىنتىماقتاستىق ۇيىمى پارلامەنتتىك وداعى، ت م د پ ا ا، ش ى ۇ سىندى ۇيىمدار بار.
ايتا كەتەرلىگى، وسىناۋ وتە ماڭىزدى ءارى اۋقىمدى پارلامەنتتىك شارا قازاقستاندا ءبىرىنشى رەت وتكىزىلۋدە. القالى جيىننىڭ «ۇلكەن ەۋرازيا: ديالوگ. سەنىم. سەرىكتەستىك» تاقىرىبى كەزدەيسوق تاڭدالماعان. كەزدەسۋ قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ ەۋرازيالىق ينتەگراتسيا تۋرالى يدەياسىنىڭ 25 جىلدىعىمەن تۇسپا- تۇس كەلىپ وتىر.
قازاقستاننىڭ باستى ۇستانىمى - ەۋرازيانى ەلدەر اراسىندا بولاتىن قاراما- قايشىلىقتارعا، سونىمەن قاتار جاھاندىق قاۋىپ- قاتەرلەرگە قارسى بىرلەسىپ، ۇجىمدىق شەشۋ الاڭى رەتىندە سەرىكتەستىكتىڭ تۇبەگەيلى جاڭا مودەلىن ەنگىزۋ.
وسى كەڭەستە ەۋروپا مەن ازيا پارلامەنتشىلەرى ەۋرازيالىق كەڭىستىكتىڭ قاۋىپسىز جانە تۇراقتى دامۋىن قامتاماسىز ەتۋ جولدارى، 21 - عاسىردىڭ ءىرى ينتەگراتسيالىق ەكونوميكالىق جوبالارىن جۇزەگە اسىرۋدىڭ جولدارىن تالقىلايدى. پانەلدىك سەسسيالار، فورۋم اياسىندا جوسپارلانعان ءبىرقاتار ەكىجاقتى كەزدەسۋلەر ەۋرازيا كەڭىستىگىندەگى پارلامەنت وكىلدەرىنىڭ زاڭنامالىق تاجىريبە الماسۋىنا، ەل حالىقتارىنىڭ ءال- اۋقاتىن جاقسارتۋ جولىندا ورتاق ماقساتتاردى ۇيلەستىرۋگە ۇلەس قوسۋعا مۇمكىندىك بەرەدى.
ەستەرىڭىزگە سال كەتسەك، ەۋرازيا ەلدەرى پارلامەنتتەرى ءتوراعالارىنىڭ العاشقى كەڭەسى رەسەيدە ۇيىمداستىرىلىپ، ودان كەيىن وڭتۇستىك كورەيادا، تۇركيادا وتكەن ەدى.
اۆتور: مارلان جيەمباي