جەدەل جاردەمگە جول بەرمەگەندەر 4 جىلعا باس بوستاندىعىنان ايىرىلۋى مۇمكىن

نۇر-سۇلتان. قازاقپارات - رەسەي فەدەراتسياسىنىڭ مەملەكەتتىك دۋماسىنىڭ زاڭناما جونىندەگى كوميتەتى تومەنگى پالاتاعا مەديتسينالىق جەدەل جاردەمگە كەدەرگى كەلتىرگەندەرگە، سونىڭ ىشىندە، «جەدەل جاردەم» كولىگىن وتكىزبەگەندەرگە قىلمىستىق جاۋاپكەرشىلىك قاراستىراتىن زاڭ جوباسىن قابىلداۋدى تاپسىردى.

بۇل جايىندا regnum.ru اقپارات كوزى حابار تاراتتى. اتالعان ەلدىڭ قىلمىستىق كودەكسىنە ءىشىنارا وزگەرىستەر ەنگىزىلۋى مۇمكىن. اتالعان ماسەلە بويىنشا، ياعني، ر ف قىلمىستىق كودەكسىنە جەدەل مەديتسينالىق جاردەم جۇمىسىنا قاساقانا كەدەرگى كەلتىرگەندەر ءۇشىن ارنايى باپ ەنگىزىلمەك.

ەگەر بۇل باپ ەنگىزىلەتىن بولسا رف قىلمىستىق كودەكسىنە، وندا ەڭ از دەگەندە ايىپكەرگە (كىناسى دالەلدەنگەن جاعدايدا) 80 مىڭ رۋبل ايىپپۇل سالىنباق نەمەسە ايىپتالۋشىنىڭ كەسىرىنەن ناۋقاس ءولىپ كەتسە، 4 جىل مەرزىمگە باس بوستاندىعىنان ايىرماق. ءيا بولماسا ەكى جىلعا دەيىن ءماجبۇرلى تۇردە جۇمىسقا جەگىلەدى.

islam.kz